Powěsće: srjedu, 29.06.2022
Hauptinhalt
29. smažnika 2022, 10:26 hodź.
Europeada: Serbske mustwo prěnje w štafli
Njerozsudnje 1:1 skónči so wutoru poslednja hra předkoła za Serbske mustwo. Wrota přećiwo Romam z Madźarskeje docpě Jan Bogusz. Z tym je serbske mustwo prěnje w skupinje D Europeady. Přećiwnik zasakle wojowaše, sydaše někotre žołte karty. Trenar přećiwniskeho mustwa dósta samo žołto-čerwjenu, tak zo dyrbješe ławku wopušćić. Srjedu wotměje so kulturny dźeń, na kotrymž so mjez druhim tež přećiwnik Serbskeho mustwa na jutřišim dnju wulosuje.
Serbske katolske wosady: Mjenje ludźi kemši chodźiło
We wšěch serbskich katolskich wosadach je loni wjele mjenje ludźi njedźelu kemši chodźiło, hač hišće před lětomaj - do korony. To wuchadźa ze statistiki, kotruž je Drježdźansko-Mišnjanske biskopstwo wozjewiło. W absolutnych ličbach w někotrych wosadach mjenje hač poł telko ludźi kemši chodźeše kaž 2019 - tak w Budyšinje a Chrósćicach. Hladajo na podźěl kemšerjow mjez wěriwymi, wučinješe spad zdźěla 20 procentowych dypkow - tak w Njebjelčicach wot 41 na 19 a w Ralbicach wot 35 na 15 procentow. Porno tomu je podźěl kemšerjow w Baćonskej wosadźe ze 40,5 procentami přeco hišće nadpřerěznje wysoki był. A tež w Kulowskej wosadźe je loni mjenje kemšerjow było. Kaž ze statistiki Zhorjelskeho biskopstwa wuńdźe, spadny podźěl wot 19 na 16 procentow.
Budyšin/Choćebuz: Załožba načasne wuměłstwo spěchowała
Za twórby štyrjoch tworjacych wuměłcow z projekta "WOBRAZY KRAJINY.PŘECHOD 03." je Załožba za serbski lud něšto wjac hač 16.000 eurow wudała. Rozsudźili su so za wobrazy Michaela Kruscheho, Franka Jošta a Helly Stolecki kaž tež za instalaciju Frauke Rahroweje. Twórby pokazaja so w Choćebuzu a Budyšinje, zdźěli nam zamołwita za marketing, Hanka Budarjowa. Z nakupom spěchuje załožba načasne wuměłstwowe tworjenje. Nimo toho dokumentuja nowonakupy wobsahi a znowawotkryća projekta. Tutón je so mjez 2019 a 2021 w kooperaciji mjez Łužiskimi, Korutanskimi a Słowjenskimi institucijemi wotměł.
Chrósćicy: Nutřkowne saněrowanje cyrkwje
Na druhe informaciske zarjadowanje k nutřkownemu wobnowjenju farskeje cyrkwje Chrósćicy je wutoru wjac hač 50 wosadnych přišło. Farar Měrćin Delenk a architekt Marko Dźisławk wuměnjenja a namjety předstajištaj, po čimž so žiwje diskutowaše. Wo někotrych dypkach z kontrernym měnjenjom su přitomni wothłosowali a z tym tendencu zwěsćili. Na přikład so wulka wjetšina wupraji za to, zo nabočnej wołtarkaj Chróšćanskeje cyrkwje na swojim městnje wostanjetej. Nutřkowne wobnowjenje ma so w awgusće zahajić a na 890.000 eurow płaćić.
Nowoslicy: Škotowi seniorojo maja noweho načolnika
Z 3113 dypkami je Siegfried Rawa škot seniorow wutoru w Nowowslicach dobył. Druhi bu Eberhard Kroschk před Achimom Mögelom. Po šěsć hrajnych kołach nawjeduje nětko Siegfried Rawa w cyłkownym hódnoćenju před dotalnym načolnikom, Herbertom Kretschmerom. 26. julija je přichodne koło serbskich kartyplacerjowy - w Lejnjanskim hosćencu.
