Powěsće: štwórtk, 30.06.2022
Hauptinhalt
30. smažnika 2022, 09:11 hodź.
Europeada: Dźensa so zaso hraje
W štwórtkownišim štwórćfinalu Europeady hraje Serbske mustwo přećiwo Chorwatam ze Serbiskeje. Hra so znowa přez livestream přenjese. Štwórćfinale wulosowachu srjedu na kóncu programa kulturneho dnja. Na tutym so wšitke mjeńšiny na wulkim jewišću předstajichu. Za Serbow zapiskachu Syman a Fabian Hejduška, Bosćan Donat a Clemens Mark hromadźe ze Serbskim mustwom wjacore serbske spěwy.
Chrósćicy: Nowe žaluzije za šulu
W Chróšćanskej zakładnej šuli so za čas lěćnych prózdnin nowe wonkowne žaluzije zatwarja. Wo nadawku za to je gmejnska rada srjedu na swojim posedźenju rozsudźiła. Nowe žaluzije, kiž hodźa so elektronisce posłužować, přičinja so při třoch rjadowniskich rumnosćach. W chłódku, kiž žaluzije skića, měło so přijomnišo wuknyć. Nimale 12.000 eurow zatwar płaći.
Hornja Łužica: Rybarjo a suchota
W Hornjej Łužicy bě dešć tuteho tydźenja rybarjam a hatarjam jenož snadne wolóženje. Wjacori plahowarjo karpow posudźuja staw wody w hatach jako kritiski. Jeli so situacija dale přiwótři, přemysluja wo nuzowym wułójenju. Dokelž suche periody přiběraja, njewuzamknu nětko wjace, zo jednotliwe haty při dlěšej suchoće hižo njewobhospodaruja - tak Andreas Stummer wot krajneho rybarskeho zwjazka.
Běła Woda: Pjenjezy za towarstwa
Energijowy koncern LEAG zaso z 60.000 eurami towarstwa w Běłej Wodźe spěchuje. Wo rozdźělenju je srjedu měšćanska rada na swojim posedźenju rozsudźiła. Połojca pjenjez da so sportowym towarstwam města. Za 12.000 tysac eurow podpěruje so młodźinske dźěło, kulturne towarstwa dóstanu podobnu sumu. Ze zbytnymi pjenjezami spěchuja so socialne towarstwa. Partnerstwo mjez koncernom a městom wobsteji wot lěta 2011.
Wulke Zdźary: Hórnikečanski jězor
Dźeń wotewrjeneho twarnišća při Hórnikečanskim jězorje přihotujetej tuchwilu Sakski wyši hórniski zarjad a LMBV, zhromadnje z Łazowskej gmejnu. Tutón informaciski dźeń wotměje so sobotu za tydźeń, 9.7., dopołdnja. Saněrowanje Hórnikečanskeho jězora traje mjeztym hižo wosme lěto. Dla lónšich zesuwanjow při Kobličanskim přibrjóhu njeje wokomiknje tež žadyn kónc wotwidźeć.
Budyšin: Centrala za přetrjebarjow
Centrala za přetrjebarjow w Budyšinje je přećahnyła do nutřkowneho města, hdźež hodźi so lěpje docpěć. Srjedu k znowawotewrjenju na Serbskej hasy 1 je so swjedźenski tydźeń zahajił. Tak su šulerjo Serbskeho gymnazija z ekspertku za zežiwjenje prěnju dźěłarničku na nowym městnje přewjedli - k naslědnym zežiwidłam. Popołdnju su seniorojo na wšelakich stacijach wjace wuknyć móhli wo přijomnych appach a dalšich techniskich finesach swojich handyjow. W přichodnych dnjach so dalše programowe dypki poskićuja.
