Rańše powěsće: srjedu, 05.07.2017


Zastupny banćik za Kamjensku Boršć wěstoty dla

Na Kamjenskej Boršći trjebaja wopytowarjo lětsa prěni raz tež na prěnim a na zakónčacym dnju swjedźenja zastupny banćik. Přičina je, zo chce město wěstoty dla na wšěch dnjach přistup na swjedźenišćo kontrolować. Na tradicionelnych ćahach šulerjow wočakuja lětsa na 1.400 dźěći a młodostnych. Kamjenska Boršć započnje so 18. awgusta a traje sydom dnjow.


Přizemišćo Budyskeje chorownje bórze hotowe

W běhu přichodneho měsaca chcedźa Hornjołužiske kliniki ponowjenje městna za přizemjenje helikopterow při Budyskej chorowni zakónčić. Po tym pak so wone hišće wužiwać njemóže. Pobrachuja hišće trěbne dowolnosće krajneje direkcije. Twarskich njedostatkow dla dyrbješe klinikum přizemišćo na třěše ponowić. Nětko liča z tym, zo móža tam wot nazymy zaso helikoptery přizemić.


Serbska kolesowarska turistiska šćežka

Turistiske zjednoćenstwo „Hornjołužiska hola a haty" chce turistiske šćežki stworić a z tym region atraktiwniši sčinić. Wčera běchu sobudźěłaćerki zjednoćenstwa z kolesami po serbskich wsach po puću a su informacije a fota jednotliwych městnow zezběrali. Z toho ma potom serbska kolesowarska turistiska šćežka nastać. Hłowny zaměr projekta je, zhotowić digitalnu kartu ze zajimawosćemi za turistow, kiž ma so pozdźišo tež w hižo eksistowacej "Oberlausitz-App" wozjewić.


Njebjelčanski wobchod trjeba naslědnika

Njebjelčanska gmejna pyta noweho wotnajerja za wobchod w gmejnskim centrumje. Dotalna mějićelka kónc awgusta ze starobnych přičin swój wobchod zawrěje. Gmejna přeje sej poskitk zežiwidłow a tworow wšědneje potrjeby. Po móžnosći měł nowy mějićel tež čerstwe twory a speciality w ekologiskej kwaliće poskićeć.


W prózdninach pola rozhłosa

Na 30 dźěći Worklečanskeho horta je wčera studijo Serbskeho rozhłosa wopytało. Pod nawodom redaktorow su dźěći dźěłom w redakciji zeznali a na praktiskich přikładach zhonili, kak so přinošk zhotowi. Hort we Worklecach je cyłe prózdniny wotewrjeny. Prěnju połojcu prózdnin su w horće, druhu połojcu maja w pěstowarni lěćnu skupinu. W Ralbicach pak maja nětko hort dwě njedźeli zawrjeny; w Chrósćicach potom štwórty a pjaty prózdninski tydźeń.

posledni raz aktualizowane: 09. pražnika 2018, 08:04 hodź.