Rańše powěsće: wutoru, 02.01.2018


Měšćanski jubilej a dalše

Město Wojerecy swjeći lětsa swoje 750-lětne wobstaće. 75 wjetšich zarjadowanjow je planowane, dwójce přez wjacore dny. Spočatk junija předwjedźetej so měšćanski dźěćacy dźeń a staroměšćanski swjedźeń. Poprawny měšćanski swjedźeń w septembrje so na pjeć dnjow podlěši. Nimo jubileja prěnjeho naspomnjenja so we Wojerecach hišće dalše swjeća, kaž 120-lětne wobstaće chorownje, załoženje ludoweje šule před 70 lětami a wotewrjenje kupnicy "Centrum" před 50 lětami. Za wšitke zarjadowanja je město dotal 60.000 eurow zaplanowało.


Policija silwester 170 króć zasadźena

Tež Hornjołužičenjo su přewažnje měrliwje nowe lěto witali. Hinak na Žitnych wikach w Budyšinje, hdźež měješe policija w silwesterskej nocy ruki połne dźěła. Byrnjež zastojnicy tam cyły čas přitomni byli, hač do ranja wjacori hewrjekarjo zachadźachu. Registrowane bu 14 zranjenjow ćěła, 30 wobškodźenjow a wjacore ranjenja a mylenja měra. Cyłkownje bu w silwesterskej nocy w Hornjej Łužicy 170 króć policija wołana.


Rozdźělne bilancy we wosadach

K zakónčenju lěta 2017 su serbske wosady rozdźělne bilancy sćahnyli, wosebje štož cyrkwinske zastupy a wustupy nastupa. W Baćonskej wosadźe na přikład njeje nichtó z cyrkwje wustupił, jedna wosoba pak je zastupiła. Porno tomu je w Radworskej wosadźe loni 15 ludźi z cyrkwje wustupiło - jedna wosoba pak, kotraž je to hižo před lětami činiła, loni znowa zastupi. W Kulowskej katolskej wosadźe je ličba wosadnych loni samo šwarnje rozrostła - wo wjace hač 200 wěriwych.


Wot dźensa přizjewjenja móžne

Za čas lětušeho Łužiskeho hudźbneho lěća wot kónca julija do spočatka awgusta ma so znowa přewjesć chórowa akademija. Zajimcy móža so wot dźensa hač do 31. januara přizjewić, tak hłowny organizator hudźbneho lěća, Götz Müller. Chórowa akademija, kiž bě so loni spontanje prěni raz přewjedła, steji lětsa pod hesłom „Salve Regina". Nawjeduje ju cyrkwinski hudźbny direktor Friedemann Bejma.


Běhajo do noweho lěta

Marija Škodźina z Wotrowa je na 39. silwesterskim běhu w Oberlichtenauwje na distancy 9,2 kilometraj w cyłkownym hódnoćenju druhe městno wobsadźiła, w swojej starobnej klasy bu rodźena Zejičanka samo prěnja. Cyłkownje je so w Oberlichtenauwje 408 běharkow a běharjow wobdźěliło. Prěni nowolětny běh budźe njedźelu we Wojerecach.

posledni raz aktualizowane: 02. wulkeho róžka 2018, 10:00 hodź.