Rańše powěsće : pjatk, 05.01.2018


Projekty inkluzije so spěchuja

Sakska je loni wšelake projekty inkluzije z wjace hač 700.000 eurami podpěrała. To zdźěli sakska ministerka za wědomosć a kulturu, Eva-Maria Stange, w Drježdźanach. Mjez druhim skedźbni wona na to, zo bu nowy čitanski nastroj za slepych wužiwarjow Serbskeje centralneje biblioteki spěchowany, kotraž je w Budyskim Serbskim instituće zaměstnjena. Lětsa chce Sakska za tajke projekty samo 1 milion eurow wudać. Inkluzija woznamjenja, zo móža so zbrašeni lěpje na normalnym žiwjenju wobdźěleć.


Lejnjanska mlokarnja so zhubi

Něhdyša mlokarnja w Lejnje so tele dny zwottorha. Wčera su posledne sćěny powalili. Kaž Serbske Nowiny pisachu, bě mějićel zahrodotwarskeje firmy Měrćin Kral z Pančic-Kukowa hižo loni bywšu mlokarnju kupił. Nětko wón planuje, płoninu za swój zawod wužiwać. Prědnjej twarjeni při puću pak njejstej potrjechenej. Wonej matej hinašeho wobsedźerja.


Ralbičanska swinarnja so přetwari

W Ralbičanskej kormjerni swini modernizuja tuchwilu štyri wulke chlěwy. Tele dny zwutorhaja runje sćěny a stare kanale za juchu a zatwarja nowe wokna. K tomu kładu nowu swěcu a zatwarja wentilatory, tak prokurist Rico Krause. Srjedź lěta započnu potom zbytne tři chlěwy zwotorhać a dwaj nowej natwarić. Cyłkownje ma so w Ralbičanskej kormjerni hišće hač do kónca lěta 2019 twarić. Tuchwilu je tam 7.000 swini - pozdźišo budźe jich hač do 11.400.


Nawodnistwo ALDI so rozžohnuje

Koncern ALDI je kónc lěta we Wojerecach swój regionalny zawod a w Narću tež swój centralny skład zawrěł. Za wjetšinu sobudźěłaćerjow we wobchodach ALDI Wojerowskeje wokoliny pak so ničo njezměni - wobchody wostanu wotewrjene. Zbytnym 60 přistajenym w Narću a Wojerecach su druhe dźěło poskićili, chiba zo su sej woni hižo sami nowe dźěło namakali. Z tym so regionalne nawodnistwo ALDI po 22 lětach z Wojerowskej wokolinu rozžohnuje.


Łužiskej jězoraj so zwjazatej

Po wuspěšnym polěpšenju kwality wody w Parcowskim jězorje móže so lětsa tak mjenowany Borborowy kanal za łódźe wužiwać. Kaž wjesnanosta Halštrowskeje hole, Dietmar Koark, zdźěli, ma jězor, kiž bě nastał přez rekultiwěrowanje něhdyšeje Parcowskeje brunicoweje jamy, neutralnu hódnotu Ph 7,0. To bě wuměnjenje, zo hodźi so ze susodnym Lejnjanskim jězorom zwjazać. Za to trěbny kanal bě so hižo 2003 twarił.

posledni raz aktualizowane: 05. wulkeho róžka 2018, 07:37 hodź.