Rańše powěsće: póndźelu, 05.02.2018


Młodostni na slědach zbóžneho Alojsa Andrickeho

Z kónctydźenskeje jězby do Dachauwa a Mnichowa su so wčera wječor 43ćo młodostni a štyrjo dorosćeni nawróćili. W Dachauwje wobhladachu sej koncentraciske lěhwo, hdźež bu Alojs Andricki před 75. lětami zamordowany. W Mnichowje běchu sej mjez druhim cyrkej a row swjateho Bena a arenu Alliancy wobhladali. Jězbu organizowałoj běštej Towarstwo Cyrila a Metoda a dekanatne dušepastyrstwo za młodźinu.


Maltezojo w Kamjencu wotewru nowu staciju

Chorownja Maltezow w Kamjencu wotewri na dźensnišej póndźeli staciju za pacientow, kotřiž su jenož krótki čas w chorowni. Dźak spěšnemu wuwiću mediciny hodźa so w přiběracej měrje operacije z mjeńšim nałožowanjom přewjesć. Nimo toho je z modernymi metodami zastaranja ranow spěšniše wuhojenje móžne. Tak je nowa stacija předwidźana za ludźi, kotřiž njepřebywaja w Kamjenskej klinice dlěje hač 4 dny.


Wuspěšny ptačokwasny kónc tydźenja za SLA

Wječorny ptačokwasny program Serbskeho ludoweho ansambla "Po serbskich slědach" kónc tydźenja w Kulowje, Chrósćicach a Bukecach bě přewšo derje wopytany. Štyri předstajenja je dohromady 770 ludźi widźało. Połnej běštej wosebje žurli w Chrósćicach a Bukecach. Aplaws traješe dołho, wot ansamblowcow sej přidawki wužadachu, a w Kulowje su jim "Sławu" zaspěwali.


Pola Budyskeho dwórnišća so něšto hiba

Dźensa započnje so přetwar Budyskeho dwórnišća. Najprjedy wobnowja třěchu, potom so pódlanske twary zwottorhaja. Zdobom so dwórnišćo same dospołnje saněruje, tak inwestor Gerald Lucas. W prěnim a druhim poschodźe kaž tež pod třěchu maja běrowy nastać, kotrež chce Budyski krajnoradny zarjad wotnajeć. Přetwar ma něhdźe wosom milionow eurow płaćić a hač do kónc lěta 2019 trać.


Najwuspěšniša předewzaćelka je z Kamjenca

Žona z Kamjenca je dobyła 1. myto we wurisanju wo najwuspěšnišu předewzaćelku Sakskeje 2018. Susann Mütze bu w Lipsku sobotu wot ministerki za runostajenje a integraciju, Petry Köppingoweje, počesćena. Myto je z 5000 eurami dotěrowane. Dobyćerka wjedźe z lěta 2015 blidarnju Mütze w Kamjencu, a to mjeztym w sedmej generaciji. Cyłkownje je so 53 žonow wo myto požadało.


Wuspěšny serbski spěšnosankowar

Spěšnosankowar Malyn Wićaz ze Zarěča je sej kónc tydźenja w Oberhofje při němskich mišterstwach w spěšnosankowanju titul wicemištra pola jednotliwcow wudobył a třeće městno pola dwójkow, z partnerom Markusom Arnoldom z Oberwiesenthala. Za serbskeho sankowarja, kiž startuje za RRC Altenberg, staj to dotal najwjetšej wuspěchaj.

posledni raz aktualizowane: 05. małeho róžka 2018, 08:04 hodź.