Rańše powěsće: štwórtk, 08.02.2018


Kretschmer we Wochozach

We Łužicy měło so hišće wjacore lětdźesatki brunica wudobywać. Kónc za milinu z brunicy přińdźe potom, hdyž so to hospodarsce hižo njeliči, rjekny sakski ministerski prezident Michael Kretschmer wčera při wopyće we Wochožanskej jamje. Politika njeměła tutón proces wobwliwować, tak Kretschmer dale. Wón zetka so wčera z předsydstwom LEAG, zawodnej radu a zastupjerjemi dźěłarnistwa. Za spočatk měrca je Kretschmer připowědźił forum wo přichodźe Łužicy w Běłej Wodźe. Sakscy Zeleni kritizowachu wčera, zo nastanje přez dalše dlijenje ćim wjetši časowy ćišć při přihotach na čas po brunicy a za trěbnu strukturnu změnu.


Nowy farar za Rakecy

Dr. Robert Malink budźe nowy farar ewangelsko-lutherskeje wosady w Rakecach. Předsydstwo wosady je jeho na wurjadnym posedźenju kónc januara wuzwoliło. Tučasnje farske městno w Rakecach njeje wobsadźene. Robert Malink skutkuje wot lěta 2008 jako farar w Spitzkunnersdorfje. Planowane je, zo so ze swojej serbskej swójbu w septembrje do Rakec přesydli a nowe zastojnstwo nastupi. Z tym změja Rakecy w přichodźe fararja, kiž tež serbšćinu wobknježi.


Samsne wuměnjenja za Trjebink

Energijowy koncern LEAG měł wšěm wobydlerjam Trjebinskeje gmejny, kotřiž njejsu wot přesydlenja potrjecheni, samsne wuměnjenja skićić. To žadaše sej wjesnjanosta Waldemar Locke na wčerawšim posedźenju gmejnskeje rady. Pozadk je zrěčenje gmejny ze zawodom Vattenfall z lěta 2013, w kotrymž je zastaranje Trjebina z ćopłotu na 20 lět rjadowane. Podobne rjadowanje přeja sej nětko tež za wobydlerjow Trjebinka.


Budyšin: Mjenje pjenjez za wuměłstwo

Město Budyšin ma dale předwidźane, kružny wobchad na Schliebenowej wuměłsce wuhotować dać. Poprawom mějachu za to hižo nětko spočatk lěta wuměłcy ideje zapodać. Budyšenjo bychu z toho potom swojeho faworita wuzwolili. Dokelž pak maja za projekt město planowanych 200.000 eurow jenož 86.000, chce město wašnje zwoprawdźenja hišće raz pruwować. Za to su tuchwilu w rozmołwje z Budyskim wuměłstwowym towarstwom. Rěčnik města pak wobkrući, zo budu wobydlerjo do projekta zapřijeći.


W Slepom wobydlerjo rozsudźa

W Slepjanskej gmejnje chcedźa tež wjesne dźěle z płunom zastarać, kotrež běchu hač do lońšeho wot rozšěrjenja wuhloweje jamy wohrožene. To pak so móže jenož potom stać, jeli so dosć wobydlerjow za přizamknjenje na syć rozsudźi. Cyłkownje by so dyrbjało něhdźe 14 kilometrow rołow za to kłasć. Po wobličenjach zastaraćelow by to někotre miliony eurow płaćiło. Jeli so dosć wobydlerjow za to wupraji, móhli so domjacnosće w přichodnymaj lětomaj na syć přizamknyć. Dźensa popołdnju steji w Slepom informaciski mobil, tam móža so zajimcy wo nadrobnosćach wobhonić.


Wuznamjenichu tež serbskich plahowarjow koni

Na 60 plahowarjow koni je so wčera w Lejnje k zhromadźiznje Brunjowskeho plahowanskeho towarstwa zetkało. Mjez druhim wuznamjenichu so wosebje wuspěšni plahowarjo zašłeho lěta, mjez nimi tež serbscy plahowarjo koni z Chrósćic, Ralbic a Smjerdźaceje. Dale předstaji so nowe wjednistwo Moritzburgskeje kobłarnje, kotrež informowaše zajimcow tež wo najnowšich wuwićach w zwisku z wosebitymi papjerami za wodźerjow zapřahow.

posledni raz aktualizowane: 08. małeho róžka 2018, 08:44 hodź.