Rańše powěsće: pjatk, 09.02.2018


Reakcije na koaliciske zrěčenje

Wšelacy łužiscy politikarjo su koaliciske zrěčenje za nowe Zwjazkowe knježerstwo kritizowali. Jenička sada wo škiće narodnych mjeńšin w Němskej je jenož alibi, měni zapósłanc Lěwicy Heiko Kozel. Dale je přesłapjeny, zo njejstej Unija a SPD ničo wo financowanju Załožby za serbski lud zapisałoj. Tež Marko Šiman wot CDU nima powšitkownu sadu wo mjeńšinach za dosahacu. Nimo toho žada sej wjace podpěry za strukturnje słabe regiony we wuchodnej Němskej, kaž je to Łužica.


Nadawki za Pančansku šulu přepodali

Za ponowjenje třěchi Šule Ćišinskeho w Pančicach-Kukowje je gmejnska rada na swojim wčerawšim posedźenju twarske nadawki za nimale 300.000 eurow přepodała. Zwjetša dóstachu je rjemjeslnicy z blišeje wokoliny. Dale přepodachu Róžeńčanskej Sorabiji nadawk za wottorhanske dźěła w bywšej pěstowarni, kotraž ma so na hort přetwarić.


Termin za wólby w Kamjencu

Wobydlerjo města Kamjenc wola 23. septembra noweho měšćanostu. To je měšćanska rada tutón tydźeń rozsudźiła. Dale radźićeljo financielneho wobćeženja dla wotpokazachu, zo by Kamjenc městno za koordinaciju integracije ćěkancow wutworił. Město toho chcedźa nětko zhromadnje z Budyskim wokrjesom pruwować, hač njemóhli tajke městno z pomocu spěchowanskich pjenjez Sakskeje a towarstwoweho nošerja zarjadować. Přikład za to je model, kaž jón we wšelakich tamnych komunach hižo maja.


Nowe a womłodźene předsydstwo

Nowy předsyda Towarstwa přećelow Smolerjec kniharnje je Franc Šěn. Jeho su čłonojo na wčerawšej hłownej a wólbnje zhromadźiznje za naslědnika njeboh Kita Lorenca wuzwolili. Wón bě towarstwo wot jeho spočatka před 18 lětami nawjedował. Nimo toho ponowichu a womłodźichu tež cyłe předsydstwo. Towarstwo ze 57 čłonami podpěruje a spěchuje Smolerjec kniharnju w Budyšinje.


Notowa knižka za fletu

"Zaklinči-li pišćałka, zhrěje mi so wutroba" rěka nowa notowa knižka ze serbskimi štučkami za dźěći. Měrćin Weclich je za to 40 spěwow zestajił, mjez druhim dźěćace, adwentne a hodowne. Wobdźěłał je štučki Malte Rogacki z Drježdźan, kiž je napisał třihłósne sadźby za blokowe flety a klawěrny přewod. Tajki serbski material za započatkarjow bě dotal dospołnje pobrachował, rjekny Měrćin Weclich. Wón je knižku z podpěru Załožby za serbski lud w swójskim hudźbnym nakładnistwje wudał.

posledni raz aktualizowane: 09. małeho róžka 2018, 08:29 hodź.