Serbska rěč so wuwiwa – Rěčny kućik z dr. Janu Šołćinej – 29.06.2022 Rěčny kućik – kopnjenčko
Hauptinhalt
20. pražnika 2022, 10:56 hodź.
Rěčny kućik – kopnjenčko
Dotal prawidłownje dóstawachu awtorki rěčnych kućikow wot zamołwiteho redaktora serbskeho rozhłosa mejlki z nadpismom kopnjenčko. Bě to přehlad aktualnych nahrawanjow z přećelnej próstwu, k podatym terminam dalše teksty napisać a potom tež w Budyskim studiju nahrawać. Słowo kopnjenčko w dotal předležacych słownikach zapisane njeje. Słowjeso kopnyć z němskimaj wotpowědnikomaj „hacken“ a „treten“ drje so přećelne njezda, ale kreatiwnu nowotwórbu redaktora kopnjenčko stajnje jako přećelne pominanje přiwzachmy. Bě to lube napominanje, zo so terminy wusyłanja dalšich rěčnych kućikow bliža, a zo měli so awtorki potajkim do dźěła dać. Nětko so dołholětny zamołwity za rubriku „Rěčny kućik“ - Tomaš Faska - na zasłuženy předwuměnk poda. Luby Tomašo, awtorki rěčnych kućikow so ći po tutym puću za dobre zhromadne dźěło wutrobnje dźakuja - za wšě twoje přećelne kopnjenčka, za twoju kompetentnu radu a za dobre namjety. A kaž widźiš, sy ze swojimi kreatiwnymi idejemi tež k dalšemu wuwiću serbskeje rěče přinošował!
dr. Jana Šołćina
Sorbisches Programm
