prawa za wobrazy: MDR/Teresa Stübner

Serbska rěč so wuwiwa – Rěčny kućik z dr. Anju Pohončowej - 23.11.2022 Rěčny kućik - bjezkóńčnje wospjewać (Endlosschleife)

29. nazymnika 2022, 20:38 hodź.

Rěčny kućik - bjezkóńčnje wospjewać (Endlosschleife)

Njedawno podachmoj so z mandźelskim do Rakečanskeje cyrkwje. Tam móža zajimcy hišće hač do 25. nowembra wosebitu zwukowu a swěcowu instalaciju na temu “Stworjenje (swěta)” dožiwić. Mjez dźewjećich a wječor wosmich móžeće so tam do cyrkwje sydnyć a při hudźbje wodychnyć. Zajimawe při tym njeje jenož poskać na słowa, hudźbu a spěwanje, ale tohorunja wobkedźbować so hibace lampy a wótřerěčaki. Cyły program běži bjez přitomnosće někajkeho technikarja a so stajnje wospjetuje – hdyž njeje runje Boža słužba. Němsce bychmy prajili: “Das Programm läuft in einer Endlosschleife.” Zapřijeće “Endlosschleife” wužiwa so w prěnim rjedźe w informatice. W serbskej terminologiskej zběrce za informatiku podawa so za to wuraz bjezkónčna sekla. W konteksće naspomnjeneje zwukoweje a swěcoweje instalacije pak njebych tajki fachowy wuraz wužiwała, ale skerje wo tym rěčała, zo program bjez přestawki běži abo zo so program awtomatisce resp. bjezkóńčnje wospjetuje. Tuž, lubi připosłucharjo, jědźće do Rakec, hač do soboty je zwukowa instalacija hišće přistupna běži tam nimale bjez přestawki.

dr. Anja Pohončowa