Rěčny kućik dr. Anje Pohončoweje z wusyłanja 31.08.2016 Towaršnosć sebičnikow
Hauptinhalt
31. žnjenca 2016, 10:43 hodź.
Němčina znaje wobrot „seine Ellbogen gebrauchen", w kotrymž tči wobraz, zo něchtó swoje łochće wužiwa, zo by so napřećo druhim přesadźił. Wot toho wotwodźuje so zestajenka „Ellbogengesellschaft". Z njej wopisuje so towaršnosć, w kotrejž so jednotliwc na kóšty swojich sobučłowjekow a jich njewobkedźbujo přesadźuje. W serbšćinje so wobrot w mjenowanym zmysle „swoje łochće zasadźeć" najskerje njewužiwa, byrnjež było to zrozumliwe. Jakub Bart-Ćišinski wužiwaše wobrazliwy wobrot: Wón sej z łochćom puć bodźe. Ćešo je hižo namakać serbski wotpowědnik za „Ellbogengesellschaft", na přikład w sadźe: „Wir leben in einer Ellbogengesellschaft". „Smy žiwi we łochćowej towaršnosći" je drje jenož zrozumliwe, hdyž sadu do němčiny přełožimy. Dyrbimy potajkim hinaše rozrisanje namakać, a to z pomocu wopisanja, na přikład: Smy žiwi w towaršnosći egoistow abo sebičnikow respektiwnje w egoistiskej towaršnosći. Abo wužiwamy přidatnu sadu za konkretniše charakterizowanje: Smy žiwi w towaršnosći, w kotrejž knježi prawo sylnišeho. Abo: Smy žiwi w towaršnosći, hdźež so sylniši přesadźi. - Tajka towaršnosć je snano wuspěšna, ale hladajo na słabych chětro njesocialna.
