Rěčny kućik dr. Anje Pohončoweje z wusyłanja 08.02.2017 Bewegungsmelder

08. małeho róžka 2017, 09:49 hodź.

Mnozy ludźo maja doma připrawjenu wonkownu swěcu, kotraž so zaswěći, hdyž so něchtó bliži. Za to trjeba je wosebity "Bewegungsmelder". To je nastroj, kiž wšitke pohiby we wěstym radiusu registruje a na to reaguje, w našim padźe potajkim swěcu zaswěći. Kak móžemy k tomu najlěpje serbsce prajić? W słowniku noweje leksiki smy namjetowali jako wotpowědnik "pohibowy wozjewjak"; snadź hodźa so tež wurazy "wozjewjak resp. přizjewjak pohiba" abo prosće "pohibowy sensor". Znajemy dalše nastroje, kiž podobnje funguja, ale - hinak hač čini to pohibowy sensor - woprawdźe wěsty zjaw přizjewjeja, na přikład ně. Rauchmelder abo Feuermelder. Tón jedyn registruje kur w powětře, tón tamny reaguje na woheń - wobaj nastrojej wubudźetej na to alarm, tohodla hodźi so wužiwać wuraz "signalowa abo alarmowa připrawa za kur" resp. "přizjewjak kura" za ně. Rauchmelder, a "přizjewjak woh(e)nja" abo tež "woh(e)njowy přizjewjak" za ně. Feuermelder. Tajke wosebite techniske natroje móža žiwjenje wuchować a w padźe pohiboweho sensora wopytarjej puć do domu wobswětlić.