Rěčny kućik dr. Jany Šołćineje z wusyłanja 02.07.2014 Dokoławokoło kopańcy

02. pražnika 2014, 08:50 hodź.

„Kopańca“ je tema dźensnišeho rěčneho kućika, a to aktualnych přičin dla. Ale njebojće so, ja wuslědki zašłych hrow njekomentuju, ale wěnuju so leksikaliskim prašenjam. Kopańca je drje mustwowe wubědźowanje, ale tež kóždy jednotliwc chce so stać z tym, štož rěka němsce „Torschützenkönig“. Serbsce prajimy, zo je to kral třělcow, a tak je tež zapisane w terminologiskej zběrce. Ukrainsce pomjenuje so Torschützenkönig bombardir –serbsce by to był: bombardowar, italsce samo: cannoniere, štož by serbsce rěkało: kanoněr. Někotři drje na to tukaja, zo budźe kral třělcow w Brazilskej němski hrajer Thomas Müller, ale po póndźelnišej hrě tola na tym dwěluju. W medijach so wuspěšni třělcy husto z pomocu zestajenki „Torjäger“ charakterizuja. Haj, a kak bychmy tole serbsce prajili? *hońtwjer za wrotami – skerje nic, a tuž njebych němske „Torjäger“ posłownje do serbšćiny přełožiła. Prajimy, zo je něchtó wuspěšny abo tež strašny třělc- a tajkich wuspěšnych třělcow so wězo nadźijamy za pjatkowniše štwórćfinale!