Rěčny kućik dr. Anje Pohončoweje (03.02.2016) Wuwaženosć
Hauptinhalt
15. małeho róžka 2016, 09:36 hodź.
Přeco zaso słyšimy wuraz “Nachhaltigkeit” a wězo prašamy so, kak móžemy to serbsce prajić. Po leksikonje je “Nachhaltigkeit” jednanski princip, při kotrymž steji w srjedźišću wobchowanje bytostnych kajkosćow, stabilnosće a přirodneje regeneraciskeje kmanosće někajkeho konkretneho systema, wosebje přirody, potajkim ekologiskeho systema. W tutym zwisku móžemy serbsce rěčeć wo trajnej, trajacej abo dlěšej skutkownosći, snadź tež prosće wo “wuwaženosći”. Ćešo pak je, prawy serbski adjektiw za ně. “nachhaltig” namakać. W zmysle “wirksam” hodźa so bjezdwěla adjektiwy kaž sylny, skutkowny abo mócny. Hdyž pak dźe wo wobchowanje ekologiskeho systema, wužiwamy skerje trajny, trajacy abo wuwaženy. Za ně. “nachhaltiges Wirtschaften” mamy w serbšćinje wjacore móžnosće wotpowědnik tworić, na přikład “na trajnosć abo dołhodobnosć dźiwace hospodarjenje” abo “wuwažene a resursy wobchowace hospodarjenje” abo jednorje “wuwažene hospodarjenje”. Za kotry wotpowědnik so na kóncu rozsudźiće, lubi připosłucharjo, wotwisuje sylnje wot konkretneho konteksta.
