Janek Wowčer

01. nalětnika 2011, 09:42 hodź.

Janek Wowčer, lětnik 1977, je z dalšimi koleginami a kolegami sobu zamołwity za program Serbskeho rozhłosa. Stara so wo powěsće a zdźěłuje tež přinoški za rańše wusyłanja. Wotrostł je w Róžeńće. Dźensa bydli  – njeje-li runje za Serbski rozhłós po puću – w Kulowje. Po wosom šulskich lětach na kubłanišću w Ralbicach a dalšich štyrjoch lětach na Budyskim Serbskim gymnaziju poda so po swojej ciwilnej słužbje do Lipska na studij sorabistiki a komunikaciskich wědomosćow. Studij pak z wosobinskich přičin přetorhny a studowaše na to w dalokostudiju žurnalistiku w Darmstaće, kotryž tež wuspěšnje wotzamkny.

Mój puć k rozhłosej: Hižo 1993 sedźeše Janek Wowčer w studiju Serbskeho rozhłosa před mikrofonom a moderěrowaše – tehdy z Dankom Handrikom – tydźenske młodźinske wusyłanje “Hudźba za młodych – hudźba wot młodych”. Wottam přizamkny so redakciji radija Satkule, hdźež zběraše tójšto njeparujomnych nazhonjenjow jako rozhłosowy žurnalist. Hač do 2006 skutkowaše jako swobodny žurnalist za Serbski rozhłós, Wuhladko a w dalšich wobłukach MDR. Po 16-lětnej přestawce je so w oktobrje 2022 zaso redakciji Serbskeho rozhłosa přidružił.

W swojim swobodnym času spěwa Janek Wowčer najradšo w chóromaj (muski chór Delany a cyrkwinski chór Lilija) abo šwiknje so do sedła a jěcha.