MDR TELEWIZIJA | WUHLADKO | 07.12.2019 | 11:45 hodź. WUHLADKO – decemberske wusyłanje

Kongres FUEN je rozsudźił wo Europeadźe 2020
Bildrechte: Milan Greulich/MDR

Wulosowanje skupinow

Napjatosć stupa – přećiwo komu ma so Serbska wubranka při Europeadźe 2020 w skupinskej fazy přesadźić? Kajke su krajina, ludźo a hrajnišća? WUHLADKO je při wulosowanju Europeady w Korutanskej pódla a centrum mjeńšinowych koparskich mišterstwow bliže předstaji.  

Schadźowanka

Sorbengala 2019 in Bautzen.
Bildrechte: Matej Zieschwauck/MDR

Lětuša Schadźowanka wotměje so mjeztym hižo druhi króć w Němsko-Serbskim ludowym dźiwadle w Budyšinje. Loni mějachu tam premjeru, a běše to wosebite wužadanje - wšak běše za akterow a hosći prěni króć po wjele lětach, zo je so městnosć Schadźowanki změniła. Lětsa wočakuje hosći zaso tójšto noweho ze serbskeho swěta - studentske kabarety z Drježdźan a Lipska so tuchwilu pilnje přihotuja. Ale tež dalšich akterow směmy na jewišću wočakować.

Nowy poskitk za maćerje w Swinjarni

Serbska Hornja Łužica je mjez druhim za to znata, zo maja swójby tu znajmjeńša tři dźěći. Wjele samodruhich žonow pak trjeba runje tež tu do a po porodźe babu, kotraž mać a dźěćo přewodźuje. Wšudźe w kraju su baby mjeztym jara prašane a žony dołho za so hodźacej babu pytaja. Tři młode serbske baby su sebi nětko són zwoprawdźili a wotewrěja kónc nowembra w Swinjarni swójsku praksu.

Serbski Rekwiem w Ketlicach

W rjedźe wuznamnych Serbow padnje nihdźe mjez Smolerjom, Zejlerom a Ćišinskim z wěstosću tež mjeno Korla Awgust Kocor. Oratorije kaž Serbski kwas, Žně abo Nalěćo je wón skomponował. Nimo toho operu, spěwohru a instrumentalne hudźby. Před krótkim su so tež chóry z Lubija, Žitawy a Budyšina kaž tež Collegium musicum Žitawa z jeho hudźbu zaběrali. Woni su Kocorowy serbski rekwiem nazwučowali. Kak derje je so tole drje zešłachćiło? - WUHLADKO poby na generalce kaž tež na předstajenju Serbskeho Rekwiema w Ketlicach.

Serbscy Kapałnicy

Jich stawizny sahaja 300 lět wróćo a hišće dźensa liča woni k najznaćišim hólčacym chóram Němskeje – Drježdźanscy Kapałnicy. Při tym pochadźa tójšto z jich hłosow z Łužicy. Najskěrje wjace hač 30 serbskich hólcow bě jeničce w zašłych 90 lětach z čłonom swětoznateho chóra. WUHLADKO poda so na slědy a pyta za serbskimi momentami w katolskim Drježdźanskim hólčacym chórje.