MDR TELEWIZIJA | WUHLADKO | 05.09.2020 | 11:45 hodź. WUHLADKO – septemberske wusyłanje: Nowe studijo

Nowe studijo

Budyske studijo MDR dóstanje bórze nowy domicil. Po wjace hač troch lětdźesatkach w Serbskim domje přećehnje z nim tež Serbski rozhłós do twarjenja póšty. Kak nowe studijo wupada, widźiće hižo we WUHLADKU.

Putnikowanje do Krupki

35 młodostnych je lětsa do Krupki běžało a to w najhorcyšim času lěća. Tola nimo horcoty přewodźeše jich po puću do čěskeho putniskeho města tež tema tučasneje pandemije. Što móža putnicy nimo mozlow a ćežkich nachribjetnikow hewak hišće rozprawjeć, to zhoniće w našim wusyłanju.

Serbscy darićeljo rodowych bańkow

Před něšto lětami je team WUHLADKA hižo raz Serba při darjenju rodowych bańkow přewodźało. Christian Zahrodnik bě so tehdy za to do Kölna podał. Nětko je so dalši Serb za tutón proces wuzwolił, kotryž zamóže druhim ludźom žiwjenje wuchować. Hač drje při darjenju wšitko bjez komplikacijow poběži? A kak je so serbskimaj darićelomaj po tym zešło? Wo tym rozprawjamy w septemberskim wudaću WUHLADKA.

Bjarnat Nowak 95

Bjarnat Nowak słuša k wusahowacym, ale runočasnje tež k horco diskutowanym wosobinam we Łužicy. W awgusće swjeći swoje 95. narodniny a móže na bohate a tež wichorojte žiwjenje zhladować. Z jenož 29 lětami woli so wón k 1. sekretarej Domowiny a je za mnohich hižo naslědnik hamtěrowaceho předsydy Kurta Krjeńca. Tola 1964 so Bjarnat Nowak ze wšitkich gremjiow wuzamkny – jónkrótny pad w stawiznach Domowiny.