MDR TELEWIZIJA | WUHLADKO | 02.10.2021 | 11:45 hodź. WUHLADKO – oktoberske wusyłanje

30 lět Załožba za serbski lud

Wona je financielny rjap Serbow – Załožba za serbski lud. Požadana, ale runočasnje w swojich rozsudach husto tež dwělomna, wosebje w prěnich lětach. Před 30 lětami, dnja 19. winowca 1991 so wona załoži, wosebje tež tohodla, dokelž su stare pjenježne honače knježerstwa NDR do Łužicy wusaknyli. Po znowazjednoćenju Němskeje padnu mnohe serbske institucije do financielneje dźěry a steja krótko před zawrěćom. Přetož hačrunjež zjednoćenske zrěčenje Serbam jich prawa za zachowanje serbskeje rěče a kultury garantuje, njeje jasne, kak a w kajkej formje móža so tute nětko spěchować.

Münzen liegen auf einem Bilanzpapier.
Bildrechte: colourbox.com

PowerSerb 2021

Wotrowska młodźina je lětuše PowerSerb-wubědźowanje w Radworju dobyła. Pjeć mustwow bě so na zarjadowanju wobdźěliło. Kaž zdźěli Serbske młodźinske towarstwo Pawk, bě so poprawom wjace mustwow přizjewiło, njejsu pak prosće přišli. Při Radworskej kupje dyrbjachu wobdźělnicy wjacore stacije zmištrować.

PAWK PowerSerb 2021 w Radworju
Bildrechte: Matej Zieschwauck/MDR

Reakcije po wólbach

Kak je Hornja Łužica woliła a štó region w přichodnych lětach w Zwjazkowym sejmje zastupuje? A kak zhladuja serbscy zamołwići na wólbne wuslědki? WUHLADKO tydźeń po wólbach reakcije zjima.

Zjeće ekspedicije do Pamira a Tian Shana

Kónc meje běchu so woni na puć podali – połnje motiwowani, optimiscy a wjeselo so na wulki dyrdomdej. Tola hižo start a po tym tež wotběh ekspedicije do Pamira a Tien Shana wotměštaj so hinak hač planowane. WUHLADKO zhladuje zhromadnje ze studijnym hosćom Eliasom Bětku na wjerški ekspedicije.

Wuspěšna popowa opera

Wjace hač 1.400 ludźi je předstajenja serbskeje popoweje opery „Carpe Noctem - Njeskónčna nóc“ dožiwiło. Wšitke tři kónctydźenske předstajenja běchu wupředate. Wukon 70 sobuskutkowacych na jewišću mytowaše publikum samo z dołho trajacym přikleskom.

PAWK PowerSerb 2021 w Radworju
Bildrechte: Matej Zieschwauck/MDR