MDR TELEWIZIJA | WUHLADKO | 04.12.2021 | 11:45 hodź. WUHLADKO – decemberske wusyłanje
Hauptinhalt
Serbske žiwjenje a štwórta žołma korony
Serbske regiony su tohorunja ćežko wot štwórteje žołmy koronoweje pandemije potrjechene. Samo někotre šule su tuchwilu zaso zawrjene und zjawne žiwjenje so tohorunja dla prekerneje situacije poněćim wróćo sćehnje. WUHLADKO rozprawja wo tuchwilnym stawje a wo naprawach, kotrež so nětko w Serbach zawjedu.
Kubłanje a dorost
Wot julija je Katrin Suchec-Dźisławkowa referentka Domowiny za naležnosće kubłanja a spěchowanje dorosta. Tutu funkciju třěšny zwjazk do toho dołho njeměješe. Što su nadawki referentki a čemu je so jako prěnje wěnowała? W rozmołwje z WUHLADKOM rozprawja Suchec-Dźisławkowa wo swojich planach na tutym polu, kotrež je za přichod serbstwa bytostne.
Zwjazkowy zasłužbowy křiž za Bjarnata Cyža
Zwjazkowy minister za nutřkowne naležnosće Horst Seehofer je w nowembrje w Berlinje Bjarnata Cyža ze Zwjazkowym zasłužbowym křižom počesćił. Jako něhdyši jednaćel Domowiny, wiceprezident FUEN kaž tež w čestnohamskim dźěle je so Bjarnat Cyž njesprócniwje za serbske naležnosće zasadźował. Z tym je wón prěni Serb, kotryž dósta tute wysoke wuznamjenjenje.
Schadźowanka online
Tež lětsa dyrbjachu so zamołwići za digitalnu formu Schadźowanki rozsudźić. Budyska měšćanska hala „Króna“ bě wusyłanska městnosć lětušeho programa, kiž předstaji so na jewišću. Kabarety, studentski chór a 1. Serbska kulturna brigada postarachu so wo pisanu wotměnu za přihladowarstwo doma před wobrazowku. Žurla „Króny“ běše techniski centrum, z tójšto ličakami, kamerami a swěcu. Kak je so program za kulisami zešlachćił - WUHLADKO běše pódla a rozprawja wo tym.
50 lět chór Delany
Serbski muski chór Delany zhladuje lětsa na 50. róčnicu swojeho załoženja. Hižo z prěnimi koncertami w domjacej wokolinje zdobychu sej mužojo přichilnosć ludnosće. Z małeje horstki spěwarjow nasta bórze zwukapołny muski chór, mjeztym najwjetši tutoho razu we Łužicy.
