MDR TELEWIZIJA | WUHLADKO | 07.08.2021 | 11:45 hodź. WUHLADKO – awgustowske wusyłanje

Nowe zrěčenje za Załožbu podpisane

Zwjazkowy minister Horst Seehofer a ministerskej prezidentaj Sakskeje a Braniborskeje Kretschmer a Woidke su nowe zrěčenje wo financowanju Załožby za serbski lud podpisali. Z tutym dóstanje Załožba hač do lěta 2025 nimale 24 milionow eurow wob lěto. To je něhdźe pjeć milionow wjace hač dotal. Wužiwać maja so pjenjezy za zdźerženje a spěchowanje serbskeje rěče a kultury.

 

Kolektiwizacija & Serbja: 60 lět “Socialistiske nalěćo” w ratarstwje

Běše to jedna z najwjetšich politiskich kampanjow NDR – kolektiwizacija w ratarstwje. We Łužicy pak njestaješe wona jenož tradicionelne wobsydstwowe poměry do prašenja. Zo su burske swójbje zawody do ratarskich wulkozawodow přešli, měješe masiwne wuskutki na serbsku rěč a kulturu. Na zakładźe swójbneje stawizny wuswětli WUHLADKO dramatiski čas před 60 lětami.

 

Nowosće z ekspedicije do Pamira a Tian Shana

Tež w awgustowskim wudaću WUHLADKA rozprawjamy wo nowosćach a dalšim prokročowanju ekspedicije. Pjeć přećelow wokoło Drježdźanjana Eliasa Bětki je mjeztym prěnju etapu, horiny Pamira a z tym tež prěni wjeršk Pik Lenin, absolwowało. Přichodne wulke wužadanje pak jich hižo wočakuje – wjeršk hory Khan Tengri. Wón je tohorunja něhdźe 7.000 metrow wysoki a je z tym druha najwyša hora Tian Shana.

 

Serbska popowa opera

„Carpe noctem – Njeskónčna nóc“ je najnowši projekt hudźbneho kolektiwa "Trio a Kumple”. Čerstwe spěwy a klasikarje młodych serbskich hudźbnikow přewodźuja jimacu stawiznu młodeju čłowjekow, kotrajž wobaj na swoje wašnje po nocach za prawym žiwjenjom pytataj. Nimo hudźbnikow a dźiwadźelnikow rejowarki a rejowarjo ansamblow z Wudworja a Smjerdźaceje wobraz žiweho a młodeho serbskeho wuměłstwa z načasnymi choreografijemi wudospołnjeja.