MDR TELEWIZIJA | WUHLADKO | 03.07.2021 | 11:45 hodź. WUHLADKO – julijske wusyłanje
Hauptinhalt
Domowina: Statnik znowa jako předsyda woleny
Na hłownej zhromadźiznje třěšneho zwjazka w Slepom hłosowaše něhdźe 96 procentow za njeho. Statnik je mjeztym dźesać lět předsyda Domowiny. Ćežišćo skutkowanja ma w přichodnych lětach dale zdźerženje rěče a kultury być, kaž tež so wuskutkam strukturneje změny we Łužicy wěnować. W předpolu hłowneje zhromadźizny běchu zastupjerjo skupiny Serbski Sejm Domowinu wótrje kritizowali. W syći bu třěšny zwjazk Serbow jako “starostalinistiska terorowa organizacija” a jako “kolegij haj-prajerjow” pomjenowany.
100 lět biskopstwo Drježdźany-Mišno
Drježdźansko-Mišnjanske biskopstwo woswjeći lětsa wosebity jubilej, swoju 100. róčnicu znowazałoženja. Srjedź junija běchu w katedrali w Drježdźanach swjatočne kemše, kiž je MDR live w telewiziji přenjesł. Tež Serbja běchu na Božej mši na wšelakore wašnje zapřijeći. Tak bě sej tež kwartet 1. Serbskeje kulturneje brigady do Drježdźan dojěł. Wo pozadkach Božeje mšě rozprawjamy w přichodnym wudaću WUHLADKA.
60 lět twar murje
Před 60 lětami, dnja 13. awgusta 1961, započnje so w Berlinje twar murje. Berlinjenjo a wobydlerjo wuchodneje Němskeje su bjezradni, politiske wjednistwo NDR pak swjeći twar murje – w jazyku propagandy SED je wona “antifašistiske škitne pasmo”. Hłownje pak dźe wo to, ćěkanju z NDR zadźěwać, personelnemu a intelektuelnemu wukrawjenju kraja. Přetož wot srjedź 1950tych lět wopušća stotysacy wuchodoněmskich fachowych mocow swoju domiznu, tež wjele Serbow z Łužicy. Ze zahubnymi sćěhami za hospodarstwo NDR.
Nowa šćežka Ćišinskeho
Słónčne wjedro wabi pućowarjow do Łužicy. Nic jenož do łužiskich horow, ale tež po serbskich wjeskach móža zajimcy nóžkować – a při tym tež tójšto noweho wotkryć. WUHLADKO bě po puću podłu noweje šćežki Ćišinskeho w Pančicach-Kukowje.
Nowosće wokoło ekspedicije do Pamira
Přeco hišće rěka cil wobdźělnikow sakskeje ekspedicije do Pamira: na tři wjerški nad 7000 metrow w horinach Pamir a Tian-Shana krosnować. Wo jich prěnjej etapje, wutwarje basisoweje stacije hory Pik Lenin, smy hižo w zašłym wusyłanju rozprawjeli. Kak je so pjeć přećelam wokoło Eliasa Bětki mjeztym zešło, to zhoniće w julijskim wudaću WUHLADKA.
