Zhotowimy rejowanski widejo #BEATaSMJETANA
Hauptinhalt
21. róžownika 2024, 10:57 hodź.
Za wusyłanje WUHLADKA 1. junija smy pytali dźěći, kiž chcedźa so w telewiziji wuspytać – takrjec jako mali praktikanća. Ale nic jenož to. Našej praktikantaj Franc a Madlenka staj sej mjez druhim zhromadnje z Katku Pöpelec rejku za dźěći wumysliłoj. Lube dźěći, wy wšak znajeće wideja na handiju - shorts, reels abo tik tok. A runje tajku rejku móžeće nětko doma nazwučować, nahrawać, nam pósłać a potom prěnjeho junija we WUHLADKU widźeć.
Wobhladajće sej tuž naš widejoklip a nazwučujće tam pokazane rejwanske sceny. Natočće potom swójski klip, třihajće jón a podpołožće trěbnu hudźbu. Tu namakaće tule jako download.
Dźiwajće pak na to, zo žadyn přestary handy njewužiwaće a widejo we wysokim formaće natočiće. Kedźbować dyrbiće tež na prawy wotstawk k šmóratku. Hdyž sće při wjerćenju šmóratku přeblisko, móže być zo hłowa abo noze njejsu wjac na wobrazu.
Hotowe widejo posćelće hač do najpozdźišo 27. meje z e-mailku na serbski-program@mdr.de a z tróšku zbožom widźiće swój klip 1. junija we Wuhladku.
Tuž wjele wjesela při wjerćenju a třihanju. Starši wam zawěsće rady pomhaja.