Powěsće Serbskeho rozhłosa
Hauptinhalt
03. smažnika 2024, 12:06 hodź.
Gołkojcy: Serbski ewangelski dźeń
Na 78. serbskim ewangelskim cyrkwinskim dnju w Gołkojcach pola Choćebuza swjećeštaj fararjej Tobias Pawoł Jachmann z Baršća a dr. Stefan Reichelt z Blunja swjedźensku namšu. Něhdźe 150 kemšarjow z wokoliny kaž tež z Hornjeje Łužicy bě na namšu přišło, kiž wosadny chór wobrubi. Po tym bě na pódlanskim farskim dworje wosadny swjedźeń, mjez druhim z Gołkojskimi dujerjemi a ekskursiju z kremserom do susodneho Cazowa.
Budyšin: Jubilej k 75ćinam Brigady
Z jubilejnym koncertom je 1. Serbska kulturna brigada sobotu wječor w Budyskej Krónje swoje 75. narodniny woswjećiła. Publikumej poskićichu so spěwy ze wšěch časowych dobow wobstaća kulturneho ćělesa. Nimo spěwarjow a spěwarkow w narodnej drasće, wustupi wozrodźena rejowanska skupina, mały orchester a hercy, kaž tež něhdyši hudźbnicy wokoło Conny Wolfoweje. Judith Kubicec dirigowaše nic jenož chór, ale tež publikum na połnje wobsadźenej žurli. Wobstatk programa běchu tež historiske wobrazy a nahrawanki.
Wólby: Nadal mało kandidatkow
Ke komunalnym wólbam přichodnu njedźelu, 9. junija, kandiduje w Hornjej Łužicy wjace žonow hač hišće při zašłych wólbach před pjeć lětami. Po informacijach iniciatiwy Frauen.Wahl.Lokal nastupi na přikład k wólbam do wokrjesneho sejmika w Budyšinje něhdźe 80 žonow, to je nimale 30 wjace hač 2019. Tež za wokrjesny sejmik w Zhorjelcu a za měšćansku radu w Budyšinje, Wojerecach, Niskej a druhich komunach je wjace kandidatkow. Přiwšěm leži podźěl žonow, kiž na komunalnej runinje kandiduja, jenož pola 21 procentow.
Budyšin: Serbske kursy derje přiwzate
Budyska firma Sanimu je wot lońšeho wosom kursow za prěnju pomoc w serbskej rěči poskićiła. Su to kursy, kiž su wosebje sobudźěłaćerjo serbskich institucijow wopytali kaž tež šulerjo, kotřiž so na pruwowanje za jězbnu dowolnosć přihotuja. Kaž zamołwity na naprašowanje zdźěli, běchu reakcije přewažnje pozitiwne a chcedźa kursy tež dale poskićować. Wukubłanje w prěnjej pomocy w serbskej rěči podawa sanitetar Frank Wowčer z Radworja.
Hornja Łužica: Žana wulka woda
Dla krótkich, ale sylnych zliwkow je wohnjowa wobora tež w Hornjej Łužicy dyrbjała kónc tydźenja won jěć a wosebje błóto z dróhow zmjesć. Sobotu měješe 16 zasadźenjow, wjetše škody po informacijach policije pak njeběchu. Najwjace je so we Wostrowcu dešćowało. Němska wjedrowa słužba je tam w běhu 24 hodźinow wjace hač 43 litrow na kwadratny meter naměriła.
Lipsk: Mjeńšinowe rěče cyle wulke
Druhi raz wuhotujetej w Lipsku Institut za sorabistiku a studentska iniciatiwa ERIU Lipsk "Tydźeń europskich mjeńšinowych rěčow". W srjedźišću steja předewšěm serbšćina a keltiske rěče: iršćina, šotišćina-gelšćina a walizišćina. Wot dźensnišeho do pjatka poskića so kursy kaž tež akademiske a kulturne zarjadowanja. Srjedu wopytaja wobdźělnicy Serbski institut w Budyšinje. Pjatk so wony tydźeń w Lipsku z dźěćacej uniwersitu zakónči - a to pod titulom "Małe rěče - wulke herbstwo".
