MDR TELEWIZIJA | WUHLADKO | 01.08.2020 | 11:45 hodź. WUHLADKO – awgustowske wusyłanje
Hauptinhalt
Jan Malink
Po 37 lětach słužby jako ewangelski farar w Hrodźišću a Budyšinje je so Jan Malink na wuměnk rozžohnował. 17 lět bě tež Serbski superintendent a z tym centralna figura cyrkwinskeho žiwjenja ewangelskich Serbow. Nimo toho je Malink tež politisce skutkował, wosebje w času Měrliweje rewolucije. A ze zahoritosću slědźi wo serbskich stawiznach a zajimawych wosobinach.
Měrliwa rewolucija w Serbach
Lěto 1990 je hač do dźensnišeho za někotrehožkuli Serba bolostna cesura. Za mnohich bě wone horco-zymna jězba začućow – wot euforiskeje atmosfery noweho započatka hač k hórkemu přesłapjenju. Přetož w časach rozkćěwa bazoweje demokratije zwrěšći w dwurěčnej Łužicy wjele reformow a njeporadźi so tež nowozapočatk Domowiny. WUHLADKO poda so na časowu jězbu podawkow: Wot oktobra 1989 - hač do dnja znowazjednoćenja Němskeje, 3. oktobra 1990.
Skórnik
Mjeztym hižo třeće lěto dźěłaja lěsni dźěłaćerjo a wobsedźerjo lěsow intensiwnje na tym, zo bychu chore štomy z lěsa wozyli a tak rozšěrjenju škódnika zadźěwali. Je to mjeztym jenož hišće “za-nim-spěchanje”, tak nawoda Hornjołužiskeho rewěra Rüdiger Reiz. WUHLADKO je mjez druhim na Čornobóhu pobyło a sej škody lěsa wobhladało.
Nowy zwón za Serbin w Texasu
Před něšto tydźenjemi docpě nas tuta powěsć: Město Serbin trjeba nowy zwón. Serbin bu w 1850tych lětach wot serbskich wupućowarjow załoženy. Něhdźe 550 starolutherskich Serbow ze Sakskeje a Braniborskeje (Pruskeje?) zasydli so tam pod nawodom fararja Kiliana. Boži dom w Serbinje je dokładnje po originalu cyrkwje w Klětnom nastał. Srjedź julija běše skónčnje tak daloko, po dołhich přihotach mózeše so zwón w hessenskim Sinnje pola Gießena leć.
