Wotrow: Postawa, kiž pozdatnje krawi
Hauptinhalt
19. nalětnika 2024, 14:39 hodź.
Fenomen w kapałce na priwatnej ležownosći we Wotrowje wot zašłeho kónca tydźenja wěriwych zaběra. Sobotu su prěni raz wobkedźbowali, zo je pola postawy Maćerje Božeje na hłowje Jězusdźěćatka hdys a hdys čerwjena substanca widźeć. Biskopstwo Drježdźany-Mišno zdźěli na naprašowanje, zo je wo tym informowane a we wuskim kontakće z cyrkwinskimi zamołwitymi na městnje.
Katolska cyrkej je při posudźowanju tajkich fenomenow wědomje wosebje skedźbliwa. Aktualnje so wuraznje potrjeba k jednanju njewidźi. Biskopstwo prosy wo to, tuchwilu so pohódnoćenjow a nabožnych interpretacijow fenomena wzdać. Wjele bóle maja so wobstejnosće najprjedy raz wěcownje dale wobkedźbować. Jeli trjeba, móža so pozdźišo dalše přepytowanja a analyzy přewjesć. Tuchwilu biskopstwo k tomu wuraznje žanu přičinu njewidźi.
Postawa swjateje Marije z Jězusdźěćatkom bu před pjeć lětami w Medjugorju kupjena a steji za kruće přišrubowanej lěsycu. Kapałku na Lipicy wopyta tuchwilu wšědnje tójšto ludźi z wjacorych wosadow. Wotrowčenjo so tam hač do martrowneho tydźenja wječor róžowc modla.
