prawa za wobrazy: Rafael Ledschbor

Wotrowski fenomen wujasnjeny

17. jutrownika 2024, 10:13 hodź.

Přičina za fenomen krawjaceje postawy w priwatnej kapałce we Wotrowje je wuslědźena. Kaž informuje dźensa biskopstwo Drježdźany-Mišno, kiž je substancu wědomostnje přepytować dało, jedna so wo krejne milby abo roztoče (něm.: Blutmilben).

prawa za wobrazy: Prof. Klaus Reinhardt

Profesor za coologiju na Techniskej uniwersiće Drježdźany Klaus Reinhardt je jasnje zwěsćił, zo jedna so wo normalne zadźerženje małych zwěrjatkow, kiž při stupacych temperaturach započnu pućować. Srjedź měrca běchu wěriwi w kapałce na priwatnej ležownosći we Wotrowje na postawje Maćerje Božeje a Jězusdźěćatka čerwjenu substancu zwěsćili, kiž nimale kaž krej z njeju kapaše. Trajacych diskusijow wo fenomenje dla je biskopstwo probu substancy přepruwować dało.