Serbska rěč so wuwiwa – Rěčny kućik z dr. Anju Pohončowej, dnja 22.12.2021 Rěčny kućik - swěčki zaswěćić
Hauptinhalt
22. hodownika 2021, 10:30 hodź.
Rěčny kućik - swěčki zaswěćić
Wosebitu atmosferu adwentneho a hodowneho časa wobradźeja nam swěčki. A što činimy ze swěčkami? Zapalimy abo zaswěćimy je, němsce prajimy “anzünden”, a serbsce? W dwuzwjazkowym němsko-hornjoserbskim słowniku namakamy pod hesłom „anzünden“ štyri wšelake werby, kiž měli so po rozdźělnych kontekstach wubrać. Po nim mam swěčku zapalić, cigaretu zažehlić, swěcu zaswěćić a woheń zadźěłać. Hdyž pak pohladamy do staršich słownikow abo wobhladamy sej přikłady w digitalnym korpusu hornjoserbšćiny, njemóžu tajke rozrjadowanje bjeze wšeho doporučić. Tak móžu po Pfulowym słowniku tež swěčki zaswěćić abo po Kralowym słowniku woheń zapalić. Tež z digitalneho korpusa cyle jasnje wuchadźa, zo swěčki jenož njezapalimy, ale přewažnje je zaswěćimy. W tutym zmysle, přeju Wam, lubi připosłucharjo serbskeho rozhłosa, měrny a žohnowany hodowny čas. A njezabudźće sej swěčki zapalić abo zaswěćić.
dr. Anja Pohončowa
Sorbisches Programm
