Rěčny kućik dr. Jany Šołćineje z wusyłanja 07.09.2016 Radler a Spezi
Hauptinhalt
07. požnjenca 2016, 10:43 hodź.
Njedawno so mje znaty wopraša, hač Serbja mjena napojow, kaž stej to na př. „Radler" abo „Spezi", do serbšćiny přełožuja abo nic. Najprjedy wšak měli wujasnić, wo čo so jedna, dokelž sym sej wěsta, zo tole předewšěm staršim posłucharjam znate njeje. Pomjenowani „Radler" a „Spezi" wotbłyšćujetej wulki wuběr najwšelakorišich wariantow a družinow modernych - tež měšanych napojow. Tak wobsteji „Spezi" z cole a limonady a „Radler" z piwa a limonady. Z interneta zhonich, zo njejsu na př. z piwom změšane napoje jenož nowočasna wunamakanka za kolesowarjow, ale zo su so tajke hižo w 19. lětstotku předawali. Dźensa wšak je tajki napoj jako wočerstwjenje jara woblubowany, tež tohodla, dokelž ma mjenje alkohola hač piwo. Pohladamy-li do němsko-hornjoserbskeho słownika, potom je tam zapisany přełožk „kolesowar" za němske „Radler", štož pak so jenož na wosobu poćahuje, kotraž kolesuje. Na dobro zrozumliwosće bych tuž radler a spezi tež w serbšćinje wužiwała - a nětko tež wěsće, što potom pijeće, jeli sej radler abo spezi skazaće.
