Powěsće: póndźelu, 08.04.2024
Hauptinhalt
08. jutrownika 2024, 10:05 hodź.
Budyšin: "Hercy" łamaja rekordy
Z nimale 1700 přihladowarjemi w šěsć předstajenjach běše serbskorěčna inscenacija "Na tamnym boku měsačka-HERCY" Němsko-Serbskeho ludoweho dźiwadła najwuspěšniša hra zašłych lět. Hru wo prěnjej serbskej beat-band HERCY, kotraž hraješe so sobotu k poslednjemu razej, bě napisała Hajduk-Veljkovićowa. Inscenacija nasta w nadawku Załožby za serbski lud a składnostnje mjezynarodneho europskeho projekta mjeńšinowych dźiwadłow „Mjeńšinowym rěčam hłós dać“. W nowej hrajnej dobje je inscenacija za němskorěčny hrajny plan předwidźana.
Ralbicy/Radwor: Młode jutry a prěnje swjate woprawjenja
W Ralbicach je njedźelu 19 dźěći k prěnjemu swjatemu woprawjenju přistupiło. Wšitcy sydom holcow bě w družčej drasće. Tež mnohe maćerje a dalše žony běchu so k tutej přiležnosći narodnu drastu woblekli. Popołdnju swjećachu w cyrkwi dźakny nyšpor. W Radworju je njedźelu wosom dźěći na serbskej a pjeć na němskej Božej mšě prěni raz k swjatemu woprawjenju šło. Na tutón podawk běchu so wot zašłeje nazymy přihotowali. Hižo w jutrownej nocy buštaj w Radworskej cyrkwi dwaj dorosćenaj do cyrkwje přiwzataj a staj zdobom prěni raz swjate woprawjenje přijimowałoj.
Hainewalde: Ewangelska swójbna zhromadnosć
Serbske ewangelske swójby su kónc tydźenja pod hesłom “Měr a pokoj” w Hainewalde přebywali. Za 44 wobdźělnikow bě to poradźeny wjeršk, tak organizatorka fararka Jadwiga Malinkowa. Wažne je po jeje měnjenju, zo so po cyłej Němskej rozbrójene serbske ewangelske swójby jónu wob lěto zhromadźa, so modla, spěwaja, wo wšelakich temach rěča a sportuja. Tež klětu chce Serbske ewangelske towarstwo kónc tydźenja w Hainewaldźe poskićić.
Wulke Zdźary: Krabatowe towarstwo ma noweho předsydu
Steffen Mühl je nowy předsyda towarstwa Krabat z.t. Na sobustawskej zhromadźiznje wuzwolichu Zdźarowčana za naslědnika Reinera Deutschmanna, kotryž nawjedowaše 19 lět towarstwo. 55-lětny Steffen Mühl, přistajeny pola měšćanskeho zarjada Wojerecy, chce na dźěło Reinera Deutschmanna nawjazać. Jemu je wažne, region w duchu Krabata dale zjednoćić. Towarstwo ma aktualnje 50 předewšěm institucionelnych čłonow, mjez nimi měsće Wojerecy a Kulow a Ćiskowske kulturne towarstwo.
Budyšin: Nawal a zajim za lěćne dźiwadło
Wosom tydźenjow do premjery lětušeho Budyskeho lěćneho dźiwadła je po zahajenju předpředanje sobotu štwórć lisćikow předate abo rezerwowane. To je nimale 8.700 kartkow a wotpowěduje wućeženju 25 procentow, tak Gabriela Cušcyna z Němsko-Serbskeho ludoweho dźiwadła. Porno 2023 je to jasnje wjac. Wot 6. junija šerja chodojta, hober a rumpotak šěsć tydźenjow dołho na Budyskim hrodźe w hrě "Spuk unterm Riesenrad".
Budyšin: So wo spěchowanskich programach informowali
Něhdźe 15 ludźi je so sobotu na informaciskim zarjadowanju Załožby za serbski lud k temje "Serbska rěč a kultura w strukturnej změnje" w Budyšinje wobdźěliło. Spěchowanski program, směrnicy a spěchowanski koncept za projekty w Sakskej stejachu při tym w srjedźišću. Mjez wobdźělnikami běchu mjez druhim wšelacy zamołwići z hižo běžacych projektow kaž ZARI, campusa eksperiMINT, Serbskeho instituta, Krabatoweho młyna a Serbskeho šulskeho towarstwa.
