Powěsće: wutoru, 09.04.2024
Hauptinhalt
09. jutrownika 2024, 07:39 hodź.
Budyšin: Spěchowanske próstwy zapodate
Pola Załožby za serbski lud su dóšli próstwy za 70 projektow za druhe połlěto 2024. Spěchowanski wolumen wučinja dohromady 332.000 eurow. To zdźěli załožbowa rěčnica po zakónčenju doby zapodaća. Mjez druhim su planowane: hudźbne čitanje wo Minje Witkojc w Choćebuzu na hudźbnej nazymje, młodźinski dialog župy Delnja Łužica, tema "Kwisk a trysk 2024" Serbskeje murje, a nahrawanje noweho albuma skupiny JANKAHANKA. Po pruwowanju zapodatych próstwow a posedźenju fachoweje přirady zhonja próstwarjo w přichodnych tydźenjach, hač su so wuspěšnje požadali abo nic.
Pančicy-Kukow: Dobre wuhlady na wobsadźenje direktorskeho městna
Zakładna šula w Pančicach-Kukowje ma dobre wuhlady, zo z nowym šuIskim lětom direktora abo direktorku dóstanje. To wobkrući na naprašowanje nowinska rěčnica Krajneho zarjada za kubłanje a šulu / LaSuB, Petra Nikolova. Štó nawodnistwo doskónčnje přewozmje, pak njeje hišće jasne, dokelž wjedu tuchwilu rozmołwy z požadarjemi. Za zakładnej šuli Chrósćicy a Budyšin dyrbi zarjad nawodnistwo znowa wupisać, dokelž njeje so nichtó přizjewił. Dotalna direktorka Budyskeje zakładneje šule dźěła hižo w LaSuB, nawodnistwo šule wukonja komisarisce hač do znowawobsadźenja zastupowaca direktorka Andrea Rätzowa.
Budyšin: Premjera Wjesołeje póndźele
Na 300 ludźi je wčera na prěnju - "Happy Monday-wjesołu póndźelu" do Budyšina přichwatało. Wot popołdnja pjećich wustupichu na kulturnym zarjadowanju na Žitnych wikach wjacori wuměłcy - mjez nimi znaty spěwar a hudźbnik Felix Räuber. Wo serbski podźěl dwurěčneje moderacije je so Julian Nyča postarał. Po jeho měnjenju ma zarjadowanje na to pokazać, zo je w Budyšinje mnohostronska kultura z wjele akterami. "Happy Monday" je iniciatiwa wjacorych zjednoćenstwow - mjez druhim Rěčneho centruma Witaj. Hač do 10. junija chcedźa z tym na póndźelach na wšelakich městnach w Budyšinje pokročować.
Strukturna změna: Podijowa diskusija w NSLDź
Kak móhła so strukturna změna radźić? Wo tym diskutowaše póndźelu w Němsko-Serbskim ludowym dźiwadle na połsta wobydlerjow z Budyskeho wokrjesa. Do toho běchu zapósłanc krajneho sejma, Marko Šiman, a direktor Astrocentruma Łužica, profesor Günther Hasinger, ze zawodnymi přednoškami impulsy do diskusije dali. Žiwjenska kwalita, dźěłowe městna, slědźenske centrumy a infrastruktura so mjez druhim jako wuměnjenja za wuspěch strukturneje změny mjenowachu. Haćenje je za mnohich pomałe planowanje wulkoprojektow w Němskej. Załožba Konrada Adenauera je zarjadowanje wuhotowała.
Lipsk: Rozmołwa ze serbskimi studentami
Póndźelu poby delegacija Domowiny wokoło Damiana Dyrlicha, předsydy wuběrka za serbsku ciwilnu towaršnosć a nutřkownu demokratiju, w Lipsku na rozmołwje ze serbskimi studowacymi. W centrifuze internata "Handrij Zejler" wuměnichu so wo naćisku programa Domowiny, kotryž ma so klětu schwalić. W tři hodźiny trajacej diskusiji nadeńdźechu tón abo tamny dypk, kiž měł so ewentualnje změnić abo dodać. Na přikład wuzběhnychu studenća, zo měło so kubłanje eksplicitnišo mjenować. Hač do pjatka maja serbske towarstwa nětko hišće móžnosć, namjety za změny programa pola Domowiny zapodać.
Wojerecy: Zběhanka "Łužiskeje kupjele"
Na Łužiskej kupjeli we Wojerecach su póndźelu popołdnju zběhanku přitwara ke kupanskej hali swjećili - a z tym połčas při modernizowanju kupjele. Dokładnje jedne lěto mjeztym kupjel přetwarjeja. Mjez druhim dóstanje Łužiska kupjel přidatny 25metrowski sportowy basen, basen za płuwanje ćěšenkow a nowy areal za sawnu. Wonkowny teren so za cyłolětne poskitki přestworja. Cyłkownje inwestuje so wjac hač 24 milionow eurow. Jeli wšo po planje běži, ma so kupjel lětsa w nazymje znowa wotewrěć.
