Powěsće: srjedu, 10.04.2024
Hauptinhalt
10. jutrownika 2024, 08:23 hodź.
Wodowe Hendrichecy: 56. Olympiada serbskeje rěče
Na 56. Olympiadźe serbskeje rěče wobdźěli so wot srjedy we Wodowych Hendrichecach 94 šulerjow šestych lětnikow. To je tójšto wjac hač loni, rjekny Marlis Młynkowa wot Serbskeho šulskeho towarstwa. 67 šulerjow přińdźe z Hornjeje a 28 z Delnjeje Łužicy. Zastupjene su na přikład wšě hornjoserbske wyše šule a k tomu Kulow a Slepo, Serbski gymnazij Budyšin a Lessingowy gymnazij Wojerecy. Hač do pjatka změja wobdźělnicy pisomne, ertne a skupinske nadawki rozrisać. Wučerjow při přewjedźenju 14 studentow wučerstwa podpěruje.
Budyšin: We fokusu Detlef Kobjela
Serbski ludowy ansambl da notowe zawostajenstwo Detlefa Kobjele předźěłać. Kaž praji jednaćelka SLA, Diana Wagnerec, su hižo započinali, noty Detlefa Kobjele na digitalnu a lěpje čitajomnu formu změnić. A chcedźa wšitke twórby tež w archiwje składować. To bě mjez druhim tema wutoru na spominanskim zarjadowanju k 80. posmjertnym narodninam komponista a něhdyšeho intendanta ansambla Detlefa Kobjele. Něhdźe 40 wobdźělnikow je na žurli ansambla na žiwjenje a tworjenje Kobjele zhladowało.
Wětrow: Dalše komunalne bydlenja předali
We Wětrowje móže so dalše gmejnje słušace bydlenje předać. Dotalni podružnicy wotkupja je za 13.500 eurow. Tomu je gmejnska rada Bóšicy wutoru přihłosowała. Wšo hromadźe je we Wětrowskim sydlišću na 150 něhdy komunalnych bydlenjow, z kotrychž pak je gmejna hižo něhdźe 50 předała. Nimo toho zdźěli wjesnjanosta Stani Ryćer, zo su firmy z wokoliny za wubědźowanje oldtimerow „Bóšičanski třiróžk“ dotal 7.500 eurow darili. Tutón podawk kónc měsaca pak je njejapce wohroženy. Kaž wjesnjanosta hakle wčera zhoni, Krajny zarjad za drohi a wobchad (LASuV) dotal zwučenu čaru po Wětrowje hižo njedowoli.
Pančicy-Kukow: Hrajkanišćo rosće
W Pančicach-Kukowje rosće při Klóšterskej wodźe wosrjedź wsy nowe hrajkanišćo, z arealom kołowokoło. Kaž zdźěli wjesnjanosta a zamołwity za twarske naležnosće, Markus Kreuz, přihotujetej so tam runje krutej pawiljonaj. Pod mjeńšim ma so nabiwanska stacija za elektriske kolesa zaměstnić. Pod tamnym, wjetšim, chcedźa stabilne witriny připrawić, w kotrychž móža na přikład wuměłcy z regiona swoje wudźěłki pokazać. Na hrajkanišću za wulkich a małych so hišće zbytne dźěła dočinja, tak Kreuz. Hišće lětsa ma wšo dokónčene być. Wšo dohromady płaći na 450.000 eurow. Wulki dźěl so spěchuje.
Kopańca: Přihoty serbskeho mustwa na Europeadu
Přihoty na lětušu Europeadu, na koparske mišterstwa europskich narodnych mjeńšin, w Serbach z połnej paru běža. Kaž zdźěli nawoda přihotowanskeho wuběrka Clemens Škoda, jedna Domowina tuchwilu hišće z hotelom. Clemens Škoda so nadźija, zo zrěčenje bórze podpisaja. Wobě wubrance žonow a muži stej hižo zhromadne treningi wotměłoj a přihotujetej so na testowe hry – žony změja swoju 18. meje a mužojo 24. meje.
