Powěsće: štwórtk, 11.04.2024
Hauptinhalt
11. jutrownika 2024, 10:52 hodź.
Wobsah artikla:
- Wojerecy: Serbska debata - Štó zastupuje serbski lud?
- Helsinki: Konferenca FUEN-wuběrka za kubłanje
- Trjebin: Cuze wopłóčki we wotwodowej syći
- Kamjenc: Matti Bětnar nowy šefowy lěkar chirurgije
- Pančicy-Kukow: Muzej Ćišinskeho so dlije
- Hamor: Prěnje přihoty za nowu milinarnju
- Hornja Łužica: Nato-konwoje jězdźa po A4
Wojerecy: Serbska debata - Štó zastupuje serbski lud?
Na srjedownišej 4. Serbskej debaće k temje “Štó nas zastupuje?” je předsyda Domowiny, Dawid Statnik, zastupjerjej Serbskeho sejma, Hagenej Domašce, rozmołwy poskićił. A Domaška prosy Statnika, wólby do druheho Serbskeho sejma podpěrować. Wobaj diskutowaštaj hromadźe z předsydu serbskeho ewangelskeho towarstwa, Matom Krygarjom, wo přichodźe serbskeje politiskeje participacije. Na 40 wopytowarjow je sej na poslednju Serbsku debatu do Wojerowskeje Visavis-žurle dojěło. Debaty je krajna centrala za politiske kubłanje zhromadnje ze Załožbu za Serbski lud a Serbskimi Nowinami organizowała.
Helsinki: Konferenca FUEN-wuběrka za kubłanje
Kubłanska referentka Domowiny, Katrin Suchec-Dźisławkowa, a jednaćel Serbskeho šulskeho towarstwa, Andreas Ošika, staj hač do štwórtka w Helsinkach na zetkanju kubłanskeje skupiny FUEN. Pola šwedskeje mjeńšiny w Finskej zeznaja tamniši kubłanski system, za to wopytaja šulu zwonka stolicy. Wobaj zwěsćitaj, zo je falowacy maćernorěčny wučerski dorost za wšě europske narodne mjeńšiny wulke wužadanje. Na zetkanju kubłanskeje skupiny FUEN w Helsinkach je so 20 ludźi z 15 narodnych mjeńšinow wobdźěliło.
Trjebin: Cuze wopłóčki we wotwodowej syći
W Trjebinje so z njeznateho žórła wopłóčki bjez płaćenja do wotwodoweje syće wjedu. Zwotkel wone přińdu a štó je za nje zamołwity ma so nětko wotkryć. To je gmejnska rada na swojim posedźenju srjedu rozsudźiła. Hewak hrozy gmejnje chłostanje wot wobhospodarja wodoweje syće. Za to chcedźa roły z kameru přepytować. Nimo toho maja techniske naprawy na wšelkich městnach tomu zadźěwać, zo so dale cuze wopłóčki do syće wjedu. Přez wjacore měsacy je w Trjebinje na 4.000 kubiknych metrow njepłaćenych wopłóčkow do syće běžało.
Kamjenc: Matti Bětnar nowy šefowy lěkar chirurgije
Lěkar Matti Bětnar je nowy šefowy lěkar chirurgije w Kamjenskej chorowni. To pisa chorownja w nowinarskej zdźělence. W přichodźe je Serb za njezbožowu chirurgiju w Kamjencu zamołwity. Chce ju zaso ke krutej adresy za nuzowu słužbu při prěnjotnym chirurgiskim zastaranju po njezbožach wutwarić, w zdźělence steji. Matti Bětnar je na Berlinskej Charité medicinu studował a wot 2018 na uniwersitnej chorowni w Drježdźanach dźěłał. Bě tež jedyn z mustwowych lěkarjow Dynama Drježdźany, z čimž je mjeztym přestał.
Pančicy-Kukow: Muzej Ćišinskeho so dlije
Dźěła za techniske wuhotowanje muzeja Ćišinskeho su nimale zakónčene. Póndźelu čłonojo župneho předsydstwa a Domowinskeje skupiny techniku prěni raz wuspytachu. Při tym pak zwěsćichu, zo njeje wuhotowanje 60 lět starych witrinow hižo wjac načasne. To zdźěli rěčnica Kamjenskeje župy "Michał Hórnik", Katarina Jurkowa. Tohodla pyta župa nuznje někoho, kiž by nowowuhotowanje witrinow z fachowej wědu přewodźał. Plan pak wostanje, zo so muzej lětsa hišće modernizowany zaso wotewri.
Hamor: Prěnje přihoty za nowu milinarnju
W Hamorskej milinarni přihotuje energijowy koncern LEAG tuchwilu wottorhanje štyrjoch starych chłódźenskich wěžow. W meji ma so z tym započeć. Na swobodnej přestrjeni započnje so potom tak mjenowany HUB natwarić. Tak rěka milinarnja, w kotrejž ma so na wšelke wašnje milina produkować, wosebje z wětra a słónca. Nimo toho maja tam składy za fleksibelne zastaranje z milinu nastać a naprawy za produkciju wodźika. Hač do 2029 chcedźa HUB dotwarić.
Hornja Łužica: Nato-konwoje jězdźa po A4
Na A4 w Hornjej Łužicy su hišće hač do njedźele wojerske konwoje na směr wuchod po puću. Kaž Zwjazkowa wobora zdźěli, přepołoža so wojerske jednotki jako dźěl NATO-manewra Steadfast Defender 24. Jednotki US-armeje, kaž tež z Němskeje, Španiskeje a Italskeje jědu za prěni zwučowanski tydźeń do Pólskeje a po tym dale do Litawskeje. Ze stron Zwjazkoweje wobory wobdźěli so na 1.000 wojakow z 250 jězdźidłami na zwučowanju.
