Powěsće: póndźelu, 15.04.2024
Hauptinhalt
15. jutrownika 2024, 08:19 hodź.
Wobsah artikla:
- Hochoza/Dešno: NSLDź: prapremjera błótowski krimij “Smjerś pó štučkach”
- Ćisk: Wuspěšny 9. drastowy bal
- Haslow: Koncert Lipa a přećeljo
- Budyska župa: Kubłanska jězba do Berlina
- Kulow/ Chrósćicy: Sakrament firmowanja wudźěleny
- Budyšin: Čitanske wubědźowanje w Smolerjec kniharni
- Ralbicy: Motorske ze žohnowanjom na puć
Hochoza/Dešno: NSLDź: prapremjera błótowski krimij “Smjerś pó štučkach”
W delnjołužiskej Hochozy je Němsko-Serbske ludowe dźiwadło sobotu z delnjoserbskej inscenaciju "Smjerś pó štuckach" swoju prapremjeru swjećiło. W Błótowskim krimiju wot Alexandra Maruscha a Madleńki Šołćic po powědančku Marcusa Końcarja ma komisar mordarstwo w Błótach wujasnić. Druhe předstajenje bě wčera w Dešnje. Dohromady je sej to po informacijach dźiwadła 120 ludźi wobhladało. (Hač do srjedź meje su tři dalše předstajenja planowane.)
Ćisk: Wuspěšny 9. drastowy bal
Dźewjaty drastowy bal sobotu w Ćisku je zaso jara wjele hosći wopytało - žurla bě hač na posledni stólc wobsadźena. Mjez wopytowarjemi běchu Serbska drastowa skupina ze Židźinoho, rěčna skupina Hory, wjesna zhromadnosć ze Spal, Domizniskej towarstwje z Noweho Města a Bórkowow a Drastowa skupina z Brětnjeje. Po tradicionalnym zaćahu na žurlu zapiskachu Łužiscy dujerjo z Wjelceja wšěm do rejki. Wjesna rejowanska skupina Ćisk bě wječork organizowała.
Haslow: Koncert Lipa a přećeljo
Koncert "Lipa a přećeljo" Pančičanskeho chóra Lipa sobotu a njedźelu w Haslowje je dohromady 470 wopytowarjow widźało, wobě předstajeni běštej wupředatej. Chór pad nawodom Jadwigi Kaulfürstoweje přednjese znate štučki runje tak kaž woblubowane popularne spěwy. Nimo toho zahrachu wosrjedź programa sami skeč a jako přećeljo wustupichu spěwarjo skupiny "Po štyrjoch".
Budyska župa: Kubłanska jězba do Berlina
25 čłonow Budyskeje župy "Jan Arnošt Smoler" poby sobotu na kubłanskej wuprawje w Berlinje. Wobhladachu sej wustajeńcu "Wo pčołkach a čłowjekach", kiž wěnuje so tradiciji pčołarjenja w Słowjenskej, kotraž ma, na wobydlerstwo poćahowane, najwjac pčołarjow po cyłej Europje. Hač do dźensnišeho su tam aktiwni na polu slědźenja a šěrjenja moderneho pčołarstwa. Popołdnju wobhladachu sej w Berlinje centrum za wuměłstwo, kulturu a wědomosće - Humboldtowy forum.
Kulow/ Chrósćicy: Sakrament firmowanja wudźěleny
43 młodostnych je w Kulowje wčera sakrament swjateho firmowanja přijimało. Mjez nimi bě 19 serbskich holcow a hólcow. Wšitke 11 holcow bě so družću drastu zwoblekło. Firmowanje je tež ze serbskimi słowami Zhorjelski biskop Wolfgang Ipold wudźělił. Tež w Chrósćicach bě wčera firmowanje. Wot 43 firmujomnych bě 18 družkow. Firmował je Drježdźansko-Mišnjanski biskop Heinrich Timmerevers. Wón bu witany w Kozarcach a, w korejće sedźo, wot křižerjow na konjach hač k cyrkwi přewodźany.
Budyšin: Čitanske wubědźowanje w Smolerjec kniharni
K dwacetemu razej su so najlěpši čitarjo 3. lětnikow serbskich šulow sobotu na čitanske wubědźowanje zetkali. W Budyskej Smolerjec kniharni wobdźěli so w maćernorěčnej skupinje dwanaće šulerjow, w skupinje serbšćinu wuknjacych štyrjo. Wosebje dobry wukon docpě w prěnjej skupinje Walentina Koklic z Radworskeje - a w druhej skupinje Sascha Landeckec z Budyskeje zakładneje šule. Přinoški dźěći je tež lětsa zaso jury pod nawodom Manuele Smolineje posudźowała.
Ralbicy: Motorske ze žohnowanjom na puć
Bikerojo z něhdźe 170 jězdźidłami su wčera do Ralbic k nyšporu přišli. Wosadny farar Šćěpan Delan pozbudźi wšitkich, zo bychu so tež po puću wzajomnje podpěrowali a tak biblisce jedyn brěmjo druheho sobunjesł. Tež před Božim domom, hdźež mějachu bikerojo swoje mašiny stejo, so duchowny z nimi pomodli a potom jich a wšitke jězdźidła ze swjećenej wodu pokrjepi. Ralbičanski młodźinski chór je nyšpor hudźbnje wobrubił.
