Powěsće: sobotu, 13.04.2024
Hauptinhalt
15. jutrownika 2024, 08:42 hodź.
Berlin: Nowe mjenowe prawo wobzamknjene
Serbowki móža sej w přichodźe swójbne mjeno z tradicionelnymi serbskimi kóncowkami do wupokaza zapisać dać. Njewudate žony móža při tym wuzwolić, hač chcedźa holču formu wužiwać abo kóncowku -owa/-ina kaž za wudate žony. Za dźěći móžetaj staršej serbsku formu holčeho mjena zapisać dać. To je dźěl reformy mjenoweho prawa, kotruž je Zwjazkowy sejm pjatk wobzamknył. Sejm je nowy zakoń z hłosami koalicije přiwzał, AfD hłosowaše přećiwo tomu. Nimo serbskeje tradicije mjenow wobkedźbuje reforma tež wosebitosće pola Frizow a Danow. Nowe rjadowanja płaća pak hakle wot 1. meje 2025.
Nadrózna Hrabowka: Zběhanka pola TDDK
Firma za zhotowjenje klimowych připrawow w jězdźidłach TDDK je pjatk w Nadróznej Hrabowce zběhanku za nowu produkcisku halu woswjećiła. Hala je wjace hač 150 metrow dołha, z njej so dotalne zawodowe twarjenja wo štwórćinu rozšěrjeja. Wosebitosć budźe awtomatiski wysokoregal přez wšě tři etaže twarjenja. Inwesticiija wučinja 90 milionow eurow. Pozadk je, zo zawod swoju produkciju wot mechaniskich na elektriske kompresory přestaja. Testowa faza je hižo zahajena. Klětu ma nowotwar hotowy być a serijowa produkcija startować. Japanski awtomobilowy dodawar ma w Njedźichowje 950 přistajenych.
Choćebuz: Zwjazkowe předsydstwo Domowiny wuradźowało
Nowo wobsadźeny wuběrk nětko přichodny Mjezynarodny folklorny festiwal "Łužica" přihotuje. Kaž Domowina po posedźenju Zwjazkoweho předsydstwa pjatk w Choćebuzu zdźěli, přisłušeja wuběrkej Gabriel Krawc, Błažij Handrik, Marko Kliman, Katharina Jurkowa kaž tež Pětr Brězan. Festiwal je najwjetši projekt Domowiny, na kotrymž dźěłaja čestnohamtscy a hłownohamtscy zhromadnje. Přichodny budźe klětu kónc junija.
Berlin: Kak dale po jednanjach pola Alstom
Twarc ćahow a tramwajkow Alstom a dźěłarnistwo IG Metall stej pjatk swoje rozmołwy wo přichodźe němskich stejnišćow bjez wuslědka zakónčiłoj. Kaž předsyda zawodneje rady našemu sćelakej praji, dźěłarnistwo tohodla drje tarifowe zrěčenje wupowědźi. Sobudźěłaćerjo so dotal mjez druhim swojich dowolowych pjenjez wzdadźa, zo bychu dźěłowe městna zdźeržili. Za to bě koncern slubił, inwestować a zawody w Němskej wobchować. Po měnjenju dźěłarnistwa pak je so dotal za to přemało stało.
Wodowe Henrichecy: Wuslědki Olympiady serbšćiny
Najlěpši serbšćinarjo šěstych lětnikow z Hornjeje a Delnjeje Łužicy su zwěsćeni. Na 56. Olympiadźe serbskeje rěče we Wodowych Hendrichecach su sej Józef Měrćink, Anika Delanec a Maximilian Möhn w swojich rěčnych skupinach prěnje městno za Budyski Serbski gymnazij wudobyli. Pola wyšich šulow su sej Luiza Mikławškec za Worklečansku, Magdalena Rückerec za Ralbičansku a Hanka Lohrec za Slepjansku wyšu šulu prěnje městno zawěsćili. Na olympiadźe je so wjace hač 90 šulerkow a šulerjow wobdźěliło.
Budyšin: "Budyska narěč" z Joachimom Gauckom
Nutřkowne a wonkowne wohroženja za liberalnu demokratiju běchu pjatk tema 15. wudaća rjada Budyskich narěčow w Pětrowej cyrkwi. Kaž zarjadowarjo zdźělichu, bě wone z 550 ludźimi dotal najlěpje wopytane. Něhdyši Zwjazkowy prezident Joachim Gauck wabješe w swojej narěči za to, Ukrainu dale z brónjemi podpěrować. Je tu jasne, štó je skućićel a štó je wopor, tak Gauck. Njepřećelow demokratije měli pomjenować, ale politika měła tež na starosće ludźi bóle reagować, kaž na přikład při temje připućowanje.
