Powěsće: wutoru, 16.04.2024
Hauptinhalt
16. jutrownika 2024, 08:26 hodź.
Němcy: Wo strategijach za pěstowarnju rěčeli
Wo lěpšim wućeženju Němčanskeje Witaj-pěstowarnje "Pumpot" dźěše wčera we Wojerowskej radnicy. Tuchwilu wopyta 27 dźěći kubłanišćo, kiž ma dohromady 40 městnow. Prěni króć běchu so zastupjerjo města a zamołwita za serbske naležnosće Diana Karbowa zhromadnje z wjednicu kubłanišća Janu Mejglowej, jednaćelom Serbskeho šulskeho towarstwa jako nošer pěstowarnje Andreasom Ošiku a dalšimi zamołwitymi k dźěłowej rozmołwje zetkali.
Łužiska jězorina: Mjezynarodna dźěłarnička wo rěkultiwěrowanju
Hišće hač do štwórtka přebywa wjac hač 50 ekspertow přirodoškita, hórnistwa a ratarstwa z 30 krajow we Łužiskej jězorinje. Woni zaběraja so we wjacorych dźěłarničkach a přednoškach z wědu wo rekultiwěrowanju něhdyšich brunicowych jamow. Dźensa podadźa so mjez druhim do Hamora k Bjerwałdskemu jězorej, do parka błudźenkow we Wochozach a do Pückleroweho parka w Mužakowje.
Budyšin: Chce zaso wjace serbskosće w zjawnosći
Prěnje wuspěchi koncepta za „widźomnu serbsku rěč w zjawnosći” su so wčera na wjedźenju po měsće Budyšin prezentowali. Su to štyri wobchody, kotrež nětko tež serbsce na taflach a we wukładnym woknje wabja. Za to staji sakske statne ministerstwo za nutřkowne spěchowanje we wysokosći 5.000 eurow k dispoziciji. Wobsedźerjo wobchodow wuzběhnychu pozitiwnu rezonancu a zajim turistow a kupcow na serbske popisanja. Budyski měšćanosta Karsten Vogt přepoda wobchodam wčera plaketu kampanje “Sorbisch? Na klar!” a města Budyšin. Iniciatiwa serbskeho dźěłoweho kruha chce hromadźe z měšćanskej managerku dale a wjace wikowarjow a hosćencow za kampanju zahorić.
Astrocentrum Łužica: Aktualny staw
Astrocentrum Łužica ma aktualnje 25 přistajenych a je wot nalěća w Zhorjelskej starej póšće zaměstnjeny. To praji direktor centruma, profesor Günther Hasinger. W přichodnych měsacach maja so dalše městna wobsadźić. Hdyž budźe centrum kónc přichodneho lěta po oficialnym załoženju samostatna institucija a nic hižo projekt Zwjazkoweho ministerstwa za slědźenje, potom chcedźa samo na sto ludźi wob lěto přistajić, tak Hasinger dale. Cyłkownje ma w Astrocentrumje Łužica něhdy jónu na tysac ludźi dźěłać.
Dźěwin: Gmejna ma wobzamknjeny etat
Gmejna Dźěwin chce lětsa něhdźe jedyn milion eurow inwestować. To wuchadźa z hospodarskeho plana, kiž je wona na swojim zańdźenym posedźenju wobzamknyła. Tak chce komuna za Dźěwinsku radnicu a frizerski salon w susodstwje bjezbarjerny přistup zmóžnić. Wohnjowa wobora w Dźěwinje dóstanje nowu sirenowu připrawu a wohnjowa wobora w Brězowce nowu gratownju. Jeničce za nowotwar gratownje chce gmejna kredit we wysokosći 285.000 eurow wzać.
