Powěsće: srjedu, 17.04.2024
Hauptinhalt
17. jutrownika 2024, 08:22 hodź.
Wotrow: Wuslědki pruwowanja fenomena krawjaceje postawy předleži
Přičina za pozdatnje krawjacu postawu w priwatnej kapałce we Wotrowje je wuslědźena. Kaž zdźěli biskopstwo Drježdźany-Mišno, je wědomostne přepytowanje substancy wudało, zo jedna so wo krejne milby abo roztoče (něm.: Blutmilben). To je profesor za coologiju na Techniskej uniwersiće Drježdźany Klaus Reinhardt jasnje zwěsćił. Srjedź měrca běchu wěriwi w kapałce na priwatnej ležownosći we Wotrowje na postawje Maćerje Božeje a Jězusdźěćatka čerwjenu substancu zwěsćili, kiž nimale kaž krej z njeju kapaše. Trajacych diskusijow wo fenomenje dla je biskopstwo probu substancy z hłowy Wotrowskeje postawy přepruwować dało.
Stawk wozydłownistwow: Wosebje šulerski transport potrjecheny
Z busoweho stawka hač do njedźele su tež mnohe bliskowobchadne zwiski w Hornjej Łužicy potrjechene, předewšěm šulerske transporty. Kaž Budyske předewzaće regiobus na swojich internetnych stronach zdźěli, mjez druhim busy linijow 530, 739 a 790 njepojědu. Stawk postara so tež wo ćeže při tuchwilnych pruwowanjach na gymnazijach a wyšich šulach. Kaž zdźěli direktor Budyskeho Serbskeho gymnazija René Wjacławk, so pruwowanja po planje wotměja. Z wulkimi ćežemi pak wón njeliči, dokelž zaruča wjetšinu transportow Radworske Šmitec-Šwarcec wozydłownistwo, a te njestawkuje. Přiwšěm pak je gymnazij na móžne ćeže přihotowany.
Přiwćicy: Župne předsydstwo so schadźowało
Wo skutkowanju rěčneho motiwatora za Malešecy a Bukecy, Luciana Kaulfürsta, su so wutoru čłonojo Budyskeho župneho předsydstwa "Jan Arnošt Smoler" informowali. Kaž zdźěli regionalna rěčnica Katja Liznarjec diskutowachu w běrowje rěčneho motiwatora w Přiwćicach zdobom prěnje namjety za čestne znamješko a Myto Domowiny. Tež kubłanska jězba župy a přičiny za snadne wobdźělenje starobneje skupiny 60plus bě dalša tema posedźenja.
Róžant: Nowinki z gmejny
Planowane wobzamknjenje k přepodaću nadawkow za wonkowne připrawy za nowotwar pěstowarnje w Ralbicach je so na mejske posedźenje přesunyło. To zdźěli wjesnjanosta Hubertus Ryćer na wutornišim posedźenju gmejnskeje rady gmejny Ralbicy-Róžant. Přičina su wyše wudawki za wonkowne připrawy we wysokosći něhdźe 150.000 eurow. Přichodny tydźeń je dalši termin ze zamołwitymi zarjadami na twarnišću w Ralbicach předwidźany.
Łaz: Twarske dźěła pokročuja
We Łazowskej gmejnje pokročuje přetwar gratownje za wohnjowu woboru w Šćeńcy. Tole rjekny nawoda twarskeho zarjada Jens Kieschnick wutoru k posedźenju rady. Tuchwilu dźěła so hišće při třěše, elektrika so instaluje a dnowa plata so zatwari. Spočatk meje chcedźa z přetwarom Šćeńčanskeje gratownje hotowi być. Hižo zakónčeny je přetwar tepjenja we Łazowskej pěstowarni "Kraj bajow". Tam su stare wolijowe tepjenje wutwarili a nowe, moderne płunowe tepjenje zatwarili.
Lubnjow: Zetkanje partnerow projekta UNESCO 5
Projekt UNESCO 5, w kotrymž je tež Domowina zastupjena, je wutoru nowy imageowy film za biosferowy rezerwat Błóta předstajił. W pasku je serbska kultura wuzběhnjena, zdźěli referent Domowiny za kulturu a wukraj Clemens Škoda, kiž je z Dianu Maticowej w Lubnjowje Domowinu zastupował. Předstajili su tam tež nowe trojorěčne logo “Erbe der Lausitz – Derbstwo Łužyca – Herbstwo Łužicy” a nowu internetnu strona lausitz-kultur.eu, kotraž ma hišće dalše rěčne wersije dóstać, mjez druhim tež serbskej. Kaž Škoda dale zdźěli, ma hač do lěta 2025 w nadawku UNESCO 5 imageowy film wo Serbach nastać. UNESCO 5 zwoprawdźa kulturne projekty w procesu strukturneje změny we Łužicy.
