Powěsće: štwórtk, 18.04.2024
Hauptinhalt
18. jutrownika 2024, 11:00 hodź.
Chrósćicy: Festiwalny wuběrk informuje
Wuběrk Mjezynarodneho folklorneho festiwala “Łužica” ma wot nětka dwójne wjednistwo. Na to je so cyłk na swojim zašłym posedźenju w Chrósćicach dojednał. K tomu praji jednaćelka Domowiny Judit Šołćina: "Wjeselu so, zo Katharina Jurkowa a Pětr Brězan na čestnohamtskej bazy nawod wuběrka přewzataj. Zarjad Domowiny chce wšitko činić, zo dźěło podpěruje." Zdobom ma festiwal nětko nowe logo, kiž je firma z Berlina wuwiła. Z nim ma so wabjenje zjednotnić a festiwal lóšo spóznajomny być, wobkrući nowe wjednistwo swój rozsud. Přichodny a mjeztym hižo 15. folklorny festiwal budźe klětu kónc junija w Budyšinje, Hochozy a w Chrósćicach.
Wojerecy: Zetkanje społnomócnjenych
We Wojerowskim wobydlerskim centrumje su so srjedu społnomócnjeni a zamołwići za serbske naležnosće Swobodneho stata Sakskeje zetkali. Kaž zdźěli społnomócnjena za serbske naležnosće Budyskeho wokrjesa, Halena Jancyna, witachu tež społnomócnjenu za serbske naležnosće w sakskim ministerstwje za wědomosć a kulturu, Madlenu Malinkec, w kruhu přitomnych. W čiłej rozmołwje wuměnichu so wo problemach a wužadanjach, kaž na přikład wo akceptancy a hišće njedosahacej widźomnosći serbskeje rěče w zjawnosći. W dalšej diskusiji je so wujewiło, zo přeja sej zamołwići centralny přehlad wo poskitkach serbskorěčnych kursow.
Wokrjes Budyšin: Dalše ideje zběrali
Dźěłowy kruh za serbske naležnosće wokrjesa Budyšin je so na swojim posedźenju srjedu z prěnimi idejemi a naprawami za hišće lěpše přesadźenje wustawkow k zachowanju, spěchowanju a wuwiwanju serbskeje rěče a kultury we wokrjesu Budyšin zaběrał. Zamołwići namjetowachu mjez druhim wužiwanje dwurěčneje signatury. Nimo toho maja so wšitke publikacije krajnoradneho zarjada z dwurěčnymi nadpismami wudawać. Dwurěčnosć ma so tež na taflach w zjawnych twarjenjach w nošerstwje wokrjesa jewić. Nětko ma so pruwować, što je trěbne k zwoprawdźenju namjetow.
Kulow: Nowa wabjenska brošura
"Witajće k nam do Kulowa" – tak rěka němskorěčna brošurka, kotruž je měšćanski zarjad w Kulowje wudał. W njej nadeńdźe čitar informacije a zajimawostki z wokolnych wjeskow kaž su to Sulšecy, Hózk, Mučow, Brěžki abo Dubrjeńk, nimo toho informacije k stawiznam města Kulowa, kaž tež wo nałožkach a tradicijach Serbow. Nowu brošurku dóstanu zajimcy w Kulowskej radnicy a we wobchodach města abo jako digitalnu wersiju na stronach města Kulow w interneće.
Lejno: Interaktiwny informaciski terminal přepodaty
Při Lejnjanskim jězorje w gmejnje Halštrowska Hola móža pućowacy wot nětka interaktiwny informaciski terminal wužiwać. Kaž zdźěli Zaměrowy zwjazk Łužiska jězorina, móža so tam hosćo wo móžnosćach přenocowanja, wo zarjadowanjach, wo móžnosćach pućowanja a aktiwitach, kaž tež wo gastronomiji w regionje wobhonić. Terminal je dalši měznik w prócowanjach zwjazka wo polěpšenje turistiskeje struktury we Łužiskej jězorinje w Sakskej a Braniborskej.
