Powěsće: póndźelu, 22.04.2024
Hauptinhalt
22. jutrownika 2024, 08:05 hodź.
Budyšin: Biskop Bilz na wizitaciji był
Němsko-serbske kemše w Michałskej cyrkwi w Budyšinje běchu wjeršk wulkowizitacije ewangelsko-lutherskeho krajneho biskopa Tobiasa Bilza. Cyrkwinski dostojnik wopyta w minjenych dnjach hornjołužiski wobwod, zo by so wo dźěławosći we wosadach informował. Nimo toho zetka so ze serbskimi zastupjerjemi zjawneho cyrkwinskeho, politiskeho a towarstwoweho žiwjenja.
Chrósćicy: Horjany jubilej swjećili
Dujerska kapała Horjany je sobotu w Chrósćicach swoje 30-lětne wobstaće swjećiła. Wjace hač 450 hosći je do Chróšćanskeje “Jednoty” přichwatało. Po nimale dwuhodźinskim programje dźakowachu so někotři hosćo z gratulacijemi a darami, mjez nimi tež chór Delany. Čěska dujerska kapała Božejaci, kiž wobsteji mjeztym tež hižo 120 lět, je k rejam zapiskała. Po słowach čěskeho spěwarja su sobotu tuž z jubilejom Horjanow na dohromady 150 lět dujerskeje hudźby zhladowali.
Pančicy-Kukow: Nowy klub wotewrjeny
W Pančicach-Kukowje je tamniša młodźina sobotu swoje nowe klubowe rumnosće prezentowała. Kaž zdźěli předsyda kluba, Lukas Hoge, su so nad mnohimi hosćimi wjeselili. Tež młodostni z dalšich wjeskow a klubow su sej do Pančic-Kukowa na swjedźeń a rozmołwu dojěli, tak Hoge. Projekt je so přez dwě a poł lěće ćahnył. Mjez druhim su nowe wokna a elektriku instalowali, nowu kuchnju zatwarili a tež molerske dźěła přewjedli. Pančanska młodźina je přetwar sama financowała.
Ralbicy: Kapałnicy nyšpor wobrubili
Drježdźanski hólči chór kapałnikow je njedźelu nyšpor w Ralbičanskej cyrkwi wobrubił. Pod nawodnistwom chóroweho direktora a katedralneho kapałneho mištra Christiana Bonatha zanjese něhdźe 35 hólcow w kopaće połnym Božim domje twórby komponistow wot 16. hač do 20. lětstotka kaž tež jednu swójsku. Mjez nimi bě tež „Magnifikat“, kotryž kapałnicy po kompoziciji Wolframa Menschika němsce spěwachu a wobdźělnicy nyšpora we wotměnje po zwučenej melodiji serbsce. Na spočatku nyšpora ćehnjechu wěriwi a kapałnicy serbski kěrluš spěwajo po kěrchowje.
Čorny Chołmc: Casting za Krabatowu sagu
Tójšto zajimowanych je njedźelu na zjawny casting do Čorneho Chołmca přišło. Pytali su na nim předewšěm statistow a komparsow za prěnju Krabat-sagu, kotraž budźe wot 19. junija do 7. julija na tamnišim Krabatowym młynje widźeć. Wosebite wuměnjenja zajimowani spjelnić njetrjebachu. Pytali su nimo statistow tež zwólniwych za hišće tři swobodne róle młynskich pachołow wokoło hłowneje figury Krabata. Za lětsa je 15 předstajenjow Krabatoweje sagi planowane. Wulkeho naprašowanja dla su dalše do programa přiwzali. Za někotre předstajenja su kartki hišće na předań.
