Powěsće: pjatk, 26.04.2024
Hauptinhalt
26. jutrownika 2024, 07:35 hodź.
Hospodarstwo: Nalada nadal špatna
Nalada mjez hornjołužiskimi rjemjeslnikami so dale pohubjeńša. To wuńdźe z konjunkturoweje analyzy Drježdźanskeje rjemjeslniskeje komory. Nimale kóžde pjate předewzaće je dotal mjenje wobrota nadźěłało, hač hišće loni. Dale pobrachuje fachowy personal, tež kóšty za material a energiju su stupali. Kaž zdźěli prezident komory, Jörg Dittrich, njeje so žane rjemjeslniske polo pozitiwnje wuwiło. Najwjetše straty registruja w twarskej branši. Tež inwesticije za přemysłowe twarske projekty dale spaduja.
Ralbicy-Róžant: Z gmejnskeje rady
Wočakowane wobzamknjenje k přepodaću nadawka za wonkowny wobłuk noweje Ralbičanskeje pěstowarnje njeje štwórtk na posedźenju tamnišeje gmejnskeje rady na dnjowym porjedźe stało. Přiwšem móžachu so gmejnscy radźićeljo na twarnišću w Ralbicach wo stawje dźěłow wobhonić. Přichodnu pońdźelu zahaji so dalši twarski wotrězk, hdyž so w hornim poschodźe estrich připrawi. Elektriska instalacija kablow a tykačkow je nimale hotowa, tež wokna su zatwarjene a suchotwar a sanitarne firmy dźěłaja dale pospochi.
Dźiwadło: Premjera činohrajneho studija
Premjera činohrajneho studija “Zhub so baby, zhub so” Němsko-Serbskeho ludoweho dźiwadła štwórtk w Budyšinje bě wupředata. Třo elewojo běchu w zašłych tydźenjach pod nawodom Torstena Schlossera inscenaciju nazwučowali. W premjernej narěči podšmórnje intendant Lutz Hillmann wažnosć studija jako stołp serbskeho dźiwadłoweho ansambla. Štwórtk je činohrajne studijo při NSLDź swoje 30. narodniny woswjećiło.
Slepo: Wo planach ekologiskeje milinarnje
Prěnje štyri wětrniki planowaneje ekologiskeje milinarnje w Slepom móhli za něhdźe dwě lěće dźěłać. To zdźěli tutón tydźeń zamołwity zawod enercity na wobydlerskej zhromadźiznje w Slepom. Kaž předewzaće dale informuje, wuchadźeja z toho, zo so plany za wětrniki srjedź lěta schwala, po tym zahaja so wupisanja a w nazymje 2025 bychu so twarske dźěła zahajić móhli. Hač do 2027 ma so pola Slepoho dohromady 21 wětrnikow natwarić.
Budyšin: Kak běži předpředań za jubilejny koncert Brigady w juniju?
Nimale połojca zastupnych lisćikow za jubilejny koncert 1. serbskeje kulturneje brigady w Budyskej Krónje je wupředata. To wuńdźe z internetoweje strony Serbskeho ludoweho ansambla, hdźež móžeš kartki kupić. Tuchwilu zwučuja spěwarki a spěwarjo chóra wosebje spěwy, kiž su zašłe generacije brigadnikow tež hižo spěwali a kiž słušeja do standartneho repotoira. W přichodnym času změja hišće wjace a dlěše proby, zo bychu wšitke spěwy na swjedźenju 1. junija derje sedźeli.
