Powěsće Serbskeho rozhłosa
Hauptinhalt
29. jutrownika 2024, 16:06 hodź.
Stróža: To běchu 21. němsko-serbske přirodowe wiki
Wjace hač 4.000 hosći wopyta sobotu 21. němsko-serbske přirodowe wiki w Stróži. Towarstwo Radiška, kiž je čłon župy Budyšin, měješe znowa wulki podźěl na přewjedźenju. Tak starachu so znowa wo serbsko-němsku dwurěčnosć na wikach. Tež Ludowe nakładnistwo Domowina a Serbska kulturna informacija hosći serbsce informowaštej. Nimo toho bě šulski muzej w Stróži přez cyły dźeń wočinjeny, wo kotryž so tohorunja towarstwo Radiška stara.
Chrósćicy/Hórki/Łomsk: Spominanje při pomniku
W Chrósćicach, Hórkach a we Łomsku je so njedźelu na padnjenych a zamordowanych pólskich wojakow Druheje swětoweje wójny před 79 lětami spominało. Na swjatočnosćach wobdźělichu so zastupjerjo a wobydlerjo Chróšćanskeje gmejny, Domowiny kaž tež delegacija zastupjerjow wójska a patriotiskeho twarstwa ze Żarow. Wšitcy rěčnicy wuzběhnychu w swojich spominanskich słowach trěbny měr na swěće a pokazachu na zwjazanosć mjez Serbami a Polakami. Něhdźe 200 ludźi je k pomnikomaj pod Fulkec hórku přišło.
Brěžki: Žadyn přichod za Maja
Meblowy zawod Maja w Brěžkach nima přichoda. Po słowach něhdyšeho nowinskeho rěčnika su mjeztym w stawje likwidacije. Mašiny su wottwarili a tež internetowa strona so bórze zhaša. Poslednje prócowanja wo namakanje inwestora z dźěłarnistwom IG Metal wuchodna Sakska njeběchu wuspěšne. Kónc lońšeho lěta je zawod, w kotrymž dźěłaše 450 ludźi, z produkciju meblow přestał.
Mały Wjelkow: Sotrownja jako městnosć žonow
Sotrownja Ochranowskeho bratstwa w Małym Wjelkowje přisłuša z kónca tydźenja projektej "Žónske městna Sakska". Krajna rada žonow Sakskeje je wotkryła wosebitu taflu, kiž pokaza na dźěławosć tež serbskich žonow tam na městnje, něhdy a dźensa. Něhdźe 100 wopytowarjow wuži składnosć so w serbskej a němskej rěči po terenje wodźić dać. Po cyłej Sakskej je dohromady 38 tajkich městnow, kiž su jenož žonam a jich zasłužbam wěnowane.
Hornja Łužica: Wjace mórskich worjołow
W Hornjej Łužicy je zaso wjace mórskich worjołow. Wobstatk je na 27 porow rozrostł, zdźěli rěčnik biosferoweho rezerwata "Hornjołužiska hola a haty". Měrne lěsne kónčiny kaž tež jězory a rěki skićeja worjołam idealne žiwjenske wuměnjenja. Ptaki trjebaja pak wjele ruma, tak zo je kónčina nimale wućežena. Tohodla fachowcy dalše přiběranje populacije njewočakuja. Po cyłej Sakskej su něhdźe 90 porikow znate.
Hornja Łužica: Zaso busy njejědu
Znowa póndźelu tež w Hornjej Łužicy wjacore busy njepojědu. Nimale wšitke wobchadne towaršnosće Sakskeje wot soboty stawkuja, mjez nimi tež regiobus Hornja Łužica kaž tež Wojerowske a Zhorjelske wobchadne zawody. Póndźelu připołdnju chcedźa dla tarifow w Drježdźanach dale jednać. Zamołwity dźěłarnistwa Verdi pak z toho wuchadźa, zo so tak spěšnje njedojednaja, wšako njejsu dźěłodawarjo dotal žadyn nowy poskitk předpołožili. Zaměr stawka busowych šoferow je, zo so jim na kraju samsna mzda płaći kaž we wulkoměstach.
