Moler Markus Langa k wuměłstwu w rjemjesle
pj 26.01.2024 14:27hodź.02:49 mjeń.
Wuměłstwo w rjemjesle
Před tydźenjom je Němske narodne mustwo kachlicarjow w Budyšinje swoju wušiknosć a kreatiwnosć dopokazało - k treningej za swětowe mišterstwa. Dyrbjachu mjez druhim lětoličbu 2024 wuměłsce z kachlicami kłasć.
A kotre wuměłstwo w rjemjesle poprawom takle w Serbach mamy? K tomu smy so mjez druhim z Markusom Langu zetkali. 42-lětny je hižo 17 lět dołho moler a ma tež swójsku firmu.
Hladajo na wuměłstwo w rjemjesle smy pokiw dóstali, sej raz na Horu pola Bóšic dojěć. Tam je sej elektrikar a stukater, Bosćij Hejduška, wot fachowca unikat twarić dał - wosebite kachle.
Trěbne dźěle za to je Bosćij Hejduška někotre lěta zběrał a hromadźe pytał. Někotre kachlicy su 140 lět stare.
Wuměłstwo w rjemjesle je tež w Budyšinje widźeć. Hač mosaikowe wokno w Serbskim domje, abo tu pola nas před durjemi Serbskeho rozhłosa w twarjenju póšty, při zachodźe. Tež w centrumje stareho města so wudani, raz tróšku dokładnišo do woknow hladać - na přikład do serbskeho hosćenca na Serbskej hasy. Tam wuhladaće mjenujcy Wódneho muža, Hadźaceho krala a Připołdnicu.
Monika Lukašowa rozkładźe, što ma z wonym wuměłstwom na sebi.
Sorbisches Programm