Powěsće: srjedu, 15.05.2024
Wobsah artikla:
Budyšin: Prezidij Domowiny wuradźował
Čłonojo prezidija Domowiny su na swojim posedźenju wutoru w Budyšinje wo druhim naćisku programa Domowiny wothłosowali. Wuběrk za nutřkownu demokratiju a serbsku ciwilnu towaršnosć je so w zašłych tydźenjach z namjetami zjawnosće za program zaběrał a dotalny naćisk kwalifikował. Tutón so na přichodnym wuradźowanju Zwjazkowemu předsydstwu Domowiny předstaji. To budźe 7. junija w Budyšinje.
Kašecy/Sćijecy: Tajke su truskalcy
W Kašecach su wotnětka při truskalcowym polu prěnje płody na předań. Kaž zdźěli wobsedźer dr. Christian Bock, pak móža sej kupcy najzašo po swjatkach swójske truskalcy na polu šćipać. Dotal je hišće přemało płodow, tak Bock. Na Domanic polu w Sćijecach porno tomu scyła za žnjemi njewupada. Kaž rjekny Claudia Domanjowa wot Domanic ratarskeho zawoda, je zmjerzk wjetšinu płodow zničił.
Njeswačidło: Z posedźenja gmejnskeje rady
Gmejnje Njeswačidło a Rakecy změjetej wot klětušeho zhromadne stawnistwo. Na nastork Rakečanow je Njeswačanska gmejnska rada wutoru planej přihłosowała. Jako argument za zhromadne stawnistwo mjenowaše wjesnjanosta Gerd Schuster mjez druhim falowacy personal. Dale měješe Njeswačanska rada nadawki za zwuporjedźenje šulskeje třěchi rozdawać. Wšo hromadźe by wo něhdźe 90.000 eurow šło. Dokelž pak wjacori radźićeljo wutoru prěni króć wo tym słyšachu, rozsud wotpokazachu. Nětko ma so wo wobnowjenju šulskeje třěchi pozdźišo rozsudźić.
Hornja Łužica: Kedźbu w lěsach
Strach lěsnych wohenjow w Hornjej Łužicy so nětko hižo zaso ekstremnje přiwótřa. W sewjernym dźělu Budyskeho a Zhorjelskeho wokrjesa płaći wot wutory pjaty a z tym najwyši schodźenk stracha lěsnych wohenjow. W zbytku Budyskeho wokrjesa maja schodźenk štyri. Na tym so tež hač do swjatkow wjele njezměni, přetož spadki najprjedy raz žane wotwidźeć njejsu. Jako škit za lěs so doporuča, docyła nic do lěsa hić respektiwnje hłowne šćežki nic wopušćić.
Delni Wujězd: Dróha dotwarjena
W Delnim Wujězdźe je zakładny wutwar Šulskeje drohi wotzamknjeny. Kaž zdźěli Hamorski wjesnjanosta Hendryk Balko na zašłym posedźenju gmejnskeje rady, móža jězdnju štwórtk zaso oficialnje za wobchad wotewrić. Nimo noweje asfaltoweje woršty dósta dróha na woběmaj bokomaj tež kanalej za dešćowu wodu. Cyłkownje je projekt 600.000 eurow płaćił. Dwě třećinje buštej spěchowanej z programa Sakskeje za komunalne dróhotwarske naprawy, něhdźe 200.000 eurow je gmejna Hamor jako swójski podźěl přidała.