prawa za wobrazy: MDR/Teresa Stübner

Serbska rěč so wuwiwa – Rěčny kućik z dr. Anju Pohončowej, dnja 18.05.2022 Rěčny kućik - w abo na Ukrainje?

17. róžownika 2022, 13:45 hodź.

Rěčny kućik - w abo na Ukrainje?

Mnohim čitarjam Serbskich Nowin a připosłucharjam serbskeho rozhłosa je drje napadnyło, zo wužiwa so w zwisku z Ukrainu přeco husćišo prepozicija w město na: w Ukrainje. A někotryžkuli snano hłowu wije a stona, zo dźensniši žurnalisća hižo prawu serbšćinu njewobknježa. Tomu pak tak njeje! Na swojim měrcowskim posedźenju je Hornjoserbska rěčna komisija wo tym wuradźowała, hač měło so w přichodźe prajić “sym w Ukrainje” město dotalneho “sym na Ukrainje” resp. “jědu do Ukrainy” město “jědu na Ukrainu”. Ukrainjenjo sami preferuja aktualnje dale a bóle wužiwanje prepozicije w, štož drje zwisuje ze zesylnjenym zrozumjenjom pomjenowanja Ukraina jako mjena stata a nic regiona abo krajiny. Tohodla doporuča tež Hornjoserbska rěčna komisija w zwisku z aktualnymi podawkami, kotrež potrjechja a wohrožuja suwerenosć Ukrainy jako kraja, wužiwanje formow do Ukrainy a w Ukrainje.

dr. Anja Pohončowa