prawa za wobrazy: MDR/Teresa Stübner

Serbska rěč so wuwiwa – Rěčny kućik z dr. Lenku Šołćic, 01.02.2023 Rěčny kućik: Partitiwny genitiw

01. nalětnika 2023, 13:05 hodź.

Rěčny kućik: Partitiwny genitiw

Před krótkim słyšach sadu: Ja mam tež cyły brjuch połny beton. Połny čeho? Haj, po słowje połny steji substantiw w genitiwje, potajkim by dyrbjało rěkać brjuch połny betona, kaž korbik połny hribow, zaki połne pjenjez, ruce połnej dźěła. Runje tak je to w druhich zestawach kaž na přikład šalka kofeja, a nic šalka kofej, kusk mjasa, horšć pěska abo tež mało časa, nic mało čas. Substantiw steji w formje genitiwa, hdyž rěčimy wo wěstym mnóstwje abo wo dźělu jedneje wěcy. Wězo sym so hnydom prašała, zwotkel so tuta nominatiwna forma połne beton město genitiwa betona bjerje. Jasnje to njeje, ale by to móhł wliw němčiny być, hdźež wobkedźbujemy podobny zjaw. Tam so w standardnej rěči hižo njepraji ein Glas Weines, ale jenož hišće ein Glas Wein. Ale z adjektiwom hišće ein Glas guten Weines. A jeli sedźiće nětko runje při snědani, dajće sej pomazku abo całtu z koleskom kołbasy abo plackom twarožka a šalku kofeja zesłodźeć!

dr. Lenka Šołćic