MDR TELEWIZIJA | WUHLADKO | 02.03.2024 | 11:45 hodź. WUHLADKO – měrcowske wusyłanje: Wuhlady na nalěćo a jutry
Hauptinhalt
Jutrowne jěchanje, jejkakulenje abo jutrowne wiki – w přichodnych tydźenjach wopytuja zaso tysacy hosći Sprjewine město, zo bychu serbskeje tradicije a nałožki zeznali. Tola kak widźomni su Serbja scyła w Budyšinje – w tak mjenowanej stolicy Hornjoserbow? WUHLADKO pyta za serbskimi slědami: sobotu, 02.03.2024, 11.45 hodź. w MDR telewiziji.
Dalše temy měrcowskeho wudaća:
Serbja na Berlinali
Čerwjeny přestrjenc, njeličomni prominentni a mjez nimi někotři Serbja z Chrósćic. Někotři hrajerjo dorosta koparskeho mustwa SJ Chrósćicy wobdźělichu so na projekće we wobłuku koparskeje EM 2024. Chróšćanscy koparjo běchu jedne z jědnaće młodźinskich mustwow z cyłeje Němskeje, kotrež buchu za projekt krótkofilma wot filmowcow přewodźane a předstajene. Premjera filma na festiwalu Berlinale běše cyle wosebity filmowy wječor za serbskich koparjow. WUHLADKO bě tam pódla.
Nowa a cuza domizna
Jako w februaru 2022 wójna w Ukrainje wudyri, ćěkachu tysacy tež do Němskeje. Tež Natalia a Pawel bydlitaj ze swojimaj dźěsćomaj wot toho časa w Hornjej Łužicy. Namakachu wućek pola serbskeje swójby a nadźijeja so na bórzomny kónc wójny. W swojej nowej dwurěčnej domiznje dožiwichu pomoc a podpěru. Hižo před lětom wopytaše WUHLADKO swójbu - rěčeše wo strachach a nadźiji, so bórze zaso do Ukrainy nawróćić móc. Nadźija njeje so tež lěto pozdźišo přeco hišće spjelniła. WUHLADKO je swójbu znowa wopytało.
Pozabyte rjemjesło
Hač fala, suknje, měcy abo banty. Serbska drasta je bjez módroćišća lědma předstajomna. Předewšěm wokoło Wojerec a Slepoho hrajachu hłubokomódre motiwy na běłym płaće wusahowacu rólu. Tola mjeztym dawa lědma hišće material, rezerwy płata su přetrjebane, prastare rjemjesło nimale wotemrěte a zabyte. WUHLADKO pokazuje wosebitostki serbskeho módroćišća a praša so za přichodom stareho rjemjesła.
WUHLADKO: sobotu, 02.03.2024, 11.45 hodź. w telewiziji MDR (Sakska regionalna), runočasnje jako livestream w interneće a w mediatece ARD. Wšitke přinoški maja němske podtitule. Wospjetowani: póndźelu, 04.03.2024, 6.45 hodź. w MDR a sobotu, 09.03., 13.35 hodź. w RBB (Braniborska).
