MDR TELEWIZIJA | WUHLADKO | 04.05.2024 | 11:45 hodź. WUHLADKO – mejske wusyłanje: Kinowa premjera a wo nadpadach na serbskich młodostnych
Hauptinhalt
Kinowu premjeru z dźiwadźelnikami a režiserku maja w Budyšinje skěrje zrědka. Film „Pola nas rěka wona Hanka“ pak hraje we Łužicy a přinjese Serbow na wulku kinowu sćěnu. WUHLADKO je sej dokumentarny film wobhladało a filmowču Grit Lemke při swojim dźěle přewodźało
Dalše temy mejskeho wudaća:
Nadpady na serbskich młodostnych
Ćežko zranjenaj serbskej młodostnjej, wosom njeznatych skućićelow – tak bilanca diskoweje nocy jutrownu póndźelu w Šunowje. Krótko po tym wozjewi policija, zo jednja so wo njeskutk z „antiserbskim pozadkom“. Tajke nadběhi njejsu nowe, minjene lěta je přeco zaso na swjedźenjach abo na rejach k nadpadam na serbskich młodostnych dóšło. Policija, politikarjo a statne rěčnistwo přilubichu wyšu sensibelnosć přepytowanskich instancow napřećo tajkim njeskutkam. WUHLADKO so naprašuje, što je so z tym stało a čehodla přiwšem stajnje k tajkim nadpadam kaž jutrownu póndźelu w Šunowje přindźe.
Z ćežkej techniku za zachowanje přirody
Zo by so mnohotnosć družin we Łužicy zachowała a so za generaciju našich dźěći zaručiła, zahaji so lětsa wosebity a wobšěrny přirodoškitny projekt zwjazkoweho wobswětoweho ministerstwa. Z wotstawkom najwjetša a najdróša projektowa kónčina leži njedaloko Radworja - Łučinski hat. Dokelž je hat w zašłych lětach zarostł, hrozy zhubjenje drohotneho žiwjenskeho ruma za mnohe zwěrjata. Z ćežkej techniku je so Łučinski hat wubagrował a znowa wuhotował, ze škitnymi pasmami a kumštnymi kupami. WUHLADKO přewodźa wosebity projekt a pokazuje na tutym přikładźe, kak jónkrótnje paradiz we Łužicy mamy.
Wo šćenjach a pilatkach
W nalěću je hródźach, chlěwach abo psyčich hětach stajnje tójšto hary. Je to čas dorosta. Za našu dźěćacu reporterku Helenu přičina wjac, so w zwěrjećich pěstowarnjach raz rozhladować. Što žerje poprawom pilatko a što dyrbiš při plahowanju młodych šćenjow wobkedźbować? Reporterka Helena je za WUHLADKO za wotmołwami pytała.
WUHLADKO: sobotu, 04.05.2024, 11.45 hodź. w telewiziji MDR (Sakska regionalna), runočasnje jako livestream w interneće a w mediatece ARD pod www.mdr.de/serbski-program. Wšitke přinoški maja němske podtitule. Wospjetowani: póndźelu, 06.05.2024, 6.45 hodź. w MDR a sobotu, 11.04., 13.35 hodź. w RBB (Braniborska).
