MDR TELEWIZIJA | WUHLADKO | 06.03.2021 | 11:45 hodź. WUHLADKO –měrcowske wusyłanje
Hauptinhalt
Wuhlady na jutry - 2021
Korony dla běchu lońše jutry tajke, kaž je hišće ženje dožiwili njejsmy. Žani křižerjo, žane jutrowne wiki, žane jutrowne spěwanje. A lětsa? Móža w Serbach jutrowne poselstwo zaso na konju wozjewić? A hodźa so druhe starodawne jutrowne tradicije lětsa zaso hajić? A jeli haj, pod kotrymi wuměnjenjemi?
Reformowe plany ewangelskeje cyrkwje
Přestrukturowanja abo dokładnišo prajene, zjednoćenje wšelakich ewangelskich wosadow wěriwych w dwurěčnej Łužicy chětro znjeměrnjuja. Boja so, zo so jich zajimy, wosebje pak serbske aspekty, přemało wobkedźbuja. Tež Domowina a Serbski Sejm so tohodla z temu zaběratej. Što pak měnja wobdźěleni a kak reaguje krajna cyrkej? Wo tym rozprawjachmy w měrcowskim wudaću WUHLADKA.
Serbske Braille-pismo
Pismo za slepych – je student ze sewjerneje Kaliforniskeje wuwił. Kak je to činił, je to scyła za serbskich slepych wažne a kotre namjety za wužiwanje maja? WUHLADKO wo tym rozprawješe.
60 lět klankodźiwadło Budyšin
Ze štyrjomi klankarjemi je Budyske klankodźiwadło 1961 w zadnim dworje na Jordanowej dźěłać započało, na iniciatiwu Domowiny. Dźensa po 60 lětach słuša jewišćo w dźiwadle na hrodźe k najmodernišim w Němskej. WUHLADKO podaše so na historisku jězbu po žiwych a wuspěšnych stawiznach Budyskeho klankodźiwadła.
Dobra nalada, wjesołi norojo a nowy rekord
Swoju hłowu nic do pěska, ale do konfetija tyknyć – to je hesło Kulowskich norowkow a norow a tak su lětsa wšitcy zhromadnje paslili, wili, pletli a lěpili. Mějachu mjenujcy cil, swoju póstnisku centralu a wšě wokolne wsy z najdlěšej girlandu swěta zwjazać. Wjace hač 40 kilometrow su docpěli – my smy akciju přewodźeli!
20 lět WUHLADKO – z Wami!
WUHLADKO swjeći lětsa swoje 20-lětne wobstaće. Spočatk septembra 2001 bě prěnje wudaće serbskeho telewizijneho magacina MDR widźeć. Za jubilej trjebachmy Wašu pomoc: Hdźe njejsmy z WUHLADKOM dotal pobyli? Wo čim měli raz rozprawjeć, koho abo što wopytać? Běchmy wćipni na Waše namjety.
