MDR TELEWIZIJA | WUHLADKO | 05.06.2021 | 11:45 hodź. WUHLADKO – junijske wusyłanje

WUHLADKO z nowym wobličom

Wot julija prezentuje so serbski telewizijny magacin w nowym šaće: z wjetšimi płoninami za wulke wobrazy a panoramy, kotrež mnohostronskosć serbskeho žiwjenja hišće lěpje zwobraznjeja. Po wjacorych lětach w znatym designje bě nětko na času, nowe puće kroćić. Wšako so tež wašnje, kak přihladowarjo a přihladowarki telewizijnemu programej sćěhuja, stajnje změni. WUHLADKO tež w přichodźe dale z wirtuelneho studija wusyła. Jenički realny dźěl je blido za moderaciju ze swěcowymi elementami.

100 lět biskopstwo Drježdźany-Mišno

1921 so biskopstwo Drježdźany-Mišno wot bamža Benedikta XV. znowa załoži, po tym zo bě něhdyše biskopstwo Mišno w zwisku z reformaciju zašło. Nowe biskopske sydło bu Budyšin, dokelž bě so jeničce tu po reformaciji apostoliska prefektura, biskopstwo na probu, wobchowała. Tola dla politiskeje situacije po Prěnjej swětowej wójnje dóńdźe tež w Sakskej k rozrostej nacionalizma na němskej stronje a nasta serbske narodne hibanje. Woboje wobćežowaše natwar noweho biskopstwa, kiž hinak hač w zbytnej Němskej rozsudnu wosebitosć měješe: cyrkej, kotraž wopřija dwaj ludaj – Němcow a Serbow.

SAEK – kak dale?

Sakski wukubłanski a wupruwowanski kanal w dotalnej formje so rozpušći. Budyska wotnožka je w zašłych lětach wjele pioněrskeho dźěła na polu serbskeje rěče w elektroniskich medijach zdokonjała. Kak póndźe z tym nětko dale?

Dwurěčny magacin

Dwurěčnu zawodowu nowinu wočakuješ w lokalnych institucijach abo małych regionalnych předewzaćach. Skerje mjenje pola mjezynarodneho zawoda TDDK pod japanskim wjednistwom. Wotewrjena a diwerzna filozofija předewzaća podpěraše serbskich sobudźěłaćerjow při zestajenju dwurěčneje nowiny „Echo“. Kak reaguja kolegojo - smy so w Nadróznej Hrabowce naprašowali.