Serbski basnik a spisowaćel zemrěł: Beno Budar njebohi
Hauptinhalt
08. winowca 2023, 21:45 hodź.
Basnik a spisowaćel Beno Budar je po dołhej chorosći dźensa w starobje 77 lět zemrěł. Wosebje znaty bu w Kulowje rodźeny Beno Budar přez swoje žortne basnje a powědančka. Na kóncu swojeho aktiwneho skutkowanja zaběraše so tež z 2. Swětowej wójnu a napisa na přikład knihu “Tež ja mějach zbožo”. Hromadźe z Günterom Magerom napisa scenarije za widejowu seriju wo serbskich stawiznach. Beno Budar bě sobuawtor mnohich spěwow za Měrćina Weclicha. Diplomowy slawist bě wot 1969 lektor w Ludowym nakładnistwje Domowina a po politiskej změnje redaktor dźěćaceho časopisa “Płomjo”. Wot lěta 1969 bě Beno Budar čłon Koła serbskich spisowaćelow a pozdźišeho Zwjazka serbskich wuměłcow. Wot 1998 nawjedowaše kružk pisacych w Róžeńće. 2013 spožči so jemu za jeho skutkowanje na polu literatury a kulturnych stawiznow myto Ćišinskeho.