Powěsće: wutoru, 30.03.2021
Hauptinhalt
31. nalětnika 2021, 12:38 hodź.
Budyšin: Domowina chwali Braniborsku strategiju
Domowina wita rozsud Braniborskeho sejma, so za wjacerěčny koncept zasadźować. Kaž póndźelu předsyda Dawid Statnik praji, je derje, zo je "spěchowanje wjacerěčnosće a z tym zwjazanych tradicijow a perspektiwow w Braniborskej politiski konsens". Wón připowědźi, zo chce so Domowina rady w procesu angažować. Kedźbyhódne je po měnjenju Statnika, zo prócuje so Braniborska mjez druhim wo wědu wo Serbach mjez Němcami. "Wěda wolóža zapřijeće, z kotrehož wurosće zrozumjenje," tak Statnik.
Budyski wokrjes: Lěpši zwisk z Telekom
Němska Telekom je w Budyskim wokrjesu nowe škričkowe šćežory nastajić dała a hižo wobstejace hišće lěpje wuhotowała. Nowe šćežory steja wot nětka mjez druhim w Chrósćicach, Arnsdorfje a Połčnicy. Z pomocu noweje techniki wusyłaja wot nětka po nowych 5G-standardach. Zawod Němska Telekom ma mjeztym 120 škričkowych šćežorow w Budyskim wokrjesu. Hač do 2023 chcedźa hišće 35 dalšich natwarić.
Łužiska jězorina: Widźa ćeže a šansy
Sćěhi pandemije so sylnje na ličbu turistow we Łužiskej jězorinje wuskutkuja. Kaž rjekny Kathrin Winklerowa, nawodnica turistiskeho zwjazka Łužiskeje jězoriny, je ličba dowolowarjow loni wo wjace hač 20 procentow w přirunanju z 2019 spadnyła. Doba přebywanja je porno tomu stupała, štož widźi Winklerowa jako dobre znamjo a naspomni, zo je Łužiska jězorina přiwšěm hišće region, kiž je w němskim přerězku dotal poměrnje derje wobstać móhł. Tak su campingowanje, dowol w zelenym a aktiwny turizm stajnje a bóle prašane. Turistiski zwjazk chce poskitki dale rozšěrjeć a za nje wabić. Mjez druhim matej čěska brošurka k Łužiskej jězorinje a nowa brošurka ke kolesowarskim čaram z wosebitymi cilemi nastać.
Smochćicy: Spominaja na wopory pandemije
Ćichu sobotu přewjedźe Smochčanske kubłanišćo swjateho Bena tak mjenowane "žałosćenje na ćichej soboće". Kaž zdźěli rěčnik domu, ma so w tamnišej cyrkwičce na 800 swěčkow za wšitke dotalne smjertne wopory pandemije w Budyskim wokrjesu zaswěćić. Zajimcy su přeprošeni, zarjadowanju na digitalne wašnje sćěhować. Přez krótkopowěsć abo chatowu funkciju móže kóždy swoje mysle druhim spřistupnić. Dušepastyrjo domu tute potom na symbolisku murju žałosćenja přičinja.
